Policia e Tiranës ka vënë në pranga ditën e sotme Sokol Topçiun, pronari i FarmaNet dhe një nga bizneset farmaceutike që ka përfituar miliona euro nga Ministria e Shëndetësisë dhe tenderët kanë qenë të paracaktuar për të.
Sokol Topçiu njihet si oligarku i ilaçeve në Ministrinë e Shëndetësisë. Sipas policisë, në vijim të operacionit policor të koduar “Përfitimi”, 57 -vjeçari Topçiu ishte konstatuar më parë se shiste ilaçe për kontrabandë dhe prej ditësh ishte shpallur në kërkim. Topçiu ka bashkëpunuar me personat e tjerë të arrestuar, ku shisnin medikamente të dyshuara kontrabandë.
Ilaçet që shiteshin në treg me çmim shumë herë më të lartë se sa u blenë janë: ‘inhixa, clexane, favira, alphagan, cyrotex, aricept, medro, co aprovel.’ Dyshohet se këto ilaçe u sollën në Shqipëri me 20 dollarë dhe disa prej tyre u shitën deri në 500 mijë lekë të vjetra. Të njëjtat burime konfirmojnë se të gjitha medikamentet që futeshin pa u regjistruar kryesisht përdoreshin për trajtimin e Covid-19.
Hetimi ka zgjatur 1 vit, ndërsa prokuroria kërkoi ‘arrest me burg’, por Gjykata vendosi t’i lërë në arrest shtëpie personat e identifikuar si: Blerim Bitri, 40 vjeç, administrator i një farmacie; Florian Marku, 39 vjeç, administrator i një farmacie; Margarita Xhaxhiu, 64 vjeçe, e dyshuar si dërguesja e mallrave kontrabandë; Jani Papuli, 66 vjeç, i punësuar nga Margarita Xhaxhiu; Florian Lila, 40 vjeç, administrator i një farmacie; Bashkim Osmani, 56 vjeç, administrator i një depoje farmaceutike.
Këta persona sot u lanë në masën e sigurisë ‘arrest shtëpie’.
Operacioni u zhvillua nga Seksioni për Hetimin e Krimit Ekonomik dhe Financiar në bashkëpunim me Prokurorinë e Rrethit Gjyqësor Tiranë. Hetuesit kanë bërë blerje të kontrolluara në disa raste. Shitja e këtyre medikamenteve ka zgjatur përgjatë gjithë muajve.
