Teksa vijojnë protestat e të enjteve para bashkisë së Tiranës, këshilltarët bashkiake të opozitës njoftuan këtë të hënë se kanë depozituar kërkesë për informacion lidhur me kontratat e këtij institucioni me dy kompani të huaja audituese, që sipas Erion Veliajt do të bëjnë transparencën e Bashkisë.
Dorian Teliti deklaroi se transparenca e bashkisë duhet të nisë nga publikimi i këtyre dy kontratave, pasi sipas tij as këshilltarët bashkiakë nuk kanë asnjë informacion se sa para do të shpenzohen.
“Kemi dëgjuar me zë dhe figurë, kryetarin e bashkisë së Tiranës që ka kontraktuar dy kompani, njërën britanike dhe tjetrën gjermane për të rritur procedurat e mirëqeverisjes brenda bashkisë dhe përmirësuar sistemet e auditit. Nga dolën këto kompani? Kush janë kompani? Si u kontraktuan këto dy kompani? Kur është shpallur procedura? Kur është shpallur interesi nga vetë institucioni? Cilat janë fondet e vëna në dispozicion për të paguar këto dy kontrata? Cili është qëllimi i këtyre dy kontratave? Nëse Erion Veliaj do të bëjë transparencë dhe të përmirësojë sistemet e transparencës brenda bashkisë së Tiranës, le ta fillojë duke bërë transparente këto dy marrëveshje, dy marrëveshje që ne sot, edhe të zgjedhurit bashkiakë, nuk kemi asnjë informacion. Ndonëse nuk kemi besim por megjithatë ne do të jemi përsëri këtu. Nëse pas dhjetë ditësh, Erion Veliaj bashkë me ekipin e tij dhe koordinatorin e tij të informimit për publikun, ne do të procedojmë ashtu si na e detyron edhe ligji, me hallkat e tjera, me Komisionerin e Informimit Publik dhe hallkat e tjera duke iu drejtuar institucioneve të gjykatës”, tha ai për mediat.
Discussion about this post