Tre persona të shpallur në kërkim nga autoritetet janë arrestuar nga shërbimet e Policisë Kufitare në Sarandë gjatë kontrolleve të kryera në Pikën e Kalimit Kufitar Qafë Botë dhe në Portin e Sarandës.
Sipas informacioneve paraprake, në Qafë Botë u ndalua një 20-vjeçar nga Saranda, i cili rezultonte i shpallur në kërkim me masë sigurie “Arrest në burg” për veprat penale që lidhen me armëmbajtjen pa leje dhe prishjen e qetësisë publike.
Ai dyshohet se, në bashkëpunim me persona të tjerë, ka qëlluar me armë zjarri në ajër në një zonë të banuar të Sarandës.
Po në këtë pikë kufitare u ndalua edhe një 27-vjeçar nga Divjaka, i kërkuar nga autoritetet e Tiranës për veprën penale “Kanosje”.
Ndërkohë, në Portin e Sarandës u arrestua një 43-vjeçar me banim në Angli, i shpallur në kërkim kombëtar për veprën penale “Mashtrim”.
Tre personat e ndaluar iu dorëzuan strukturave përkatëse të Policisë, ku do të vijojnë procedurat e mëtejshme ligjore.
Discussion about this post