Përplasja e Trump me median/ Gazetarët e “New York Times” në gjyq për rrjedhje të informacioneve për “Air Force One”

Administrata e Donald Trump është përfshirë në një tjetër përplasje me median amerikane, pasi katër gazetarë të “The New York Times” janë thirrur të dëshmojnë para një jurie të madhe federale në Manhattan.

Thirrjet janë lëshuar nga Departamenti Amerikan i Drejtësisë në kuadër të një hetimi për rrjedhjen e informacioneve mbi avionin e ri presidencial Air Force One, i dhuruar Shteteve të Bashkuara nga Katari.

Gazetarët Julian E. Barnes, Eric Lipton, Tyler Pager dhe Eric Schmidt janë njoftuar se duhet të paraqiten para jurisë federale javën e ardhshme.

Sipas “New York Times”, disa prej thirrjeve janë dorëzuar direkt në banesat e tyre nga agjentë federalë.

Hetimi lidhet me një artikull të publikuar nga gazeta, ku raportoheshin shqetësime të mundshme për sistemet e sigurisë së avionit të ri presidencial, një Boeing 747-8, i cili ishte planifikuar të përdorej nga presidenti amerikan.

Sipas raportimit, Trump udhëtoi me avionin e ri drejt samitit të NATO-s në Turqi, por për kthimin përdori avionin aktual presidencial. Vendimi u lidh me shqetësimet e shërbimeve të sigurisë se avioni i ri nuk kishte ende të instaluara të gjitha sistemet e avancuara të mbrojtjes.

Administrata amerikane i ka kundërshtuar këto pretendime, duke deklaruar se avioni është i pajisur me teknologji të avancuar dhe masa të forta sigurie për mbrojtjen e presidentit dhe stafit të tij.

Ndërkohë, “The New York Times” e ka cilësuar vendimin e Departamentit të Drejtësisë si një kërcënim ndaj lirisë së shtypit. Këshilltari ligjor i gazetës, David McCraw, deklaroi se detyrimi i gazetarëve për të zbuluar burimet konfidenciale dëmton rolin e medias në informimin e publikut.

Gazeta ka bërë të ditur se do t’i kundërshtojë ligjërisht kërkesat për dëshmi, duke argumentuar se mbrojtja e burimeve është një element themelor i gazetarisë investigative.

Rasti vjen në një klimë tensioni të vazhdueshëm mes administratës Trump dhe mediave të mëdha amerikane, ndërsa më herët kërkesa të ngjashme u janë drejtuar edhe gazetarëve të “Washington Post” dhe “Wall Street Journal”.