Deputeti demokrat, Saimir Korreshi akuzon Enkelejd Alibeaj se po vepron sikur PD të jetë Partia Komuniste. Madje thotë dhe se PD ka rënë e gjitha, siç ra sistemi në Shqipëri nga sulmet e Iranit.
“Shkarkuar apo ngarkuar nuk e dimë çfarë bëhet, por ka pasur një komunikim, më kanë dërguar një email. Një nga ata të kryesisë ka marrë kontributin të bëjë gjithçka aty brenda për të vendosur cilët do jenë kryetarët e degëve. Më e bukura është se ai që flet për dekomunistizim bën akte si në komunizëm. Nuk e di a jam tek PD apo tek partia marksiste leniniste”- tha Korreshi.
Teksa e cilësoi PD-në si një parti pa asnjë lloj organi funksional, Korreshi tha se mbledhja e Kuvendit për zgjedhjen e kryetarit është e pamundur në këto kushte kur nuk ka më asnjë organ që funksionon brenda demokratëve. Ai tha se fillimisht duhet të bëhet certifikimi i anëtarësisë, zgjedhjet në bazë dhe më pas zgjedhjet për kryetarin e PD-së.
“Nuk ka fraksion brenda PD-së, ka një dyzim, një pjesë e kryesisë që duan sa më shpejt zgjedhje për kryetarin e ri të partisë dhe pjesa tjetër e deputetëve që e kundërshton. Kjo ka nevojë për proces gjithëpërfshirës. Si mund të thirret një kuvend kur nuk ke më asgjë, ka rënë çdo gjë në PD”-tha Korreshi.
Ndërsa sa i takon mundësisë që Basha dhe Berisha të kandidojnë të dy për kreun e PD-së, Korreshi u shpreh se të gjithë kanë të drejtë të kandidojnë, por duhet të mendojnë sesi të japin kontributin e tyre për bashkimin e PD-së.
Discussion about this post