Deputeti demokrat Saimir Korreshi duke folur për “Breaking” tha se grupet parlamentare nuk janë si ato shpk që shkon dhe ndryshon administratorin, por funksionojnë mbi bazën e rregullave dhe rregullores.
Korreshi tha se takimet mes deputetëve synojnë krijimin e një tjetër fryme në Parlamentin shqiptar, ku opozita të ketë rolin e saj dhe të rikthejmë shpresën te opozitarët.
“Ne na kanë besuar një mision në 2021 kur ishin zgjedhjet parlamentare dhe fatkeqësisht për dy vite ne nuk e kemi përmbushur këtë mision si opozitarë.
Ne më shumë jemi marrë me njëri-tjetrin se sa me Qeverinë, me skandalet e saj, apo se çfarë bëjnë ministrat”, tha Korreshi.
Sipas tij, në këto kushte shpresojmë që tashmë të kemi tejkaluar këtë fazë dhe opozita të luajë rolin që i takon në Kuvend duke denoncuar çdo skandal, si dhe duke mbrojtur interesin publik.
I pyetur mbi zhvillimet në PD, Korreshi tha se nuk jemi marrë në këtë fazë me atë se kush është kryetari, por jemi ndalur te grupi parlamentar, unifikimi i një qëndrimi në Kuvend.
“Nuk diskutohet se do të shkojmë edhe drejt fazës për të zgjidhur drejtimin e partisë. Unë e kam shprehur se duhet një figurë që na bashkon. Deri më tani ne nuk kemi qenë pjesë e zgjedhjeve në PD, qoftë kur janë kryer nga Rithemelimi i drejtuar nga Sali Berisha ashtu edhe me procesin e Lulzim Bashës. Unë personalisht kanë thënë se duhet një figurë që na çon në fitore dhe këtë nuk e garanton dot as Berisha dhe as Basha”, tha Korreshi.
Discussion about this post