Si ka mundësi që kryebashkiaku Erion Veliaj nuk di gjë për allishverishet që bënin vartësit e tij në bashki? Këtë pyetje ngriti Belind Këlliçi, kundërshtari politik i Veliaj në zgjedhjet e fundit lokale.
Në një intervistë televizive, ish-deputeti zbuloi se drejtorët e dosjes “5 D” që ranë në pranga, ishin drejtuesit e fushatës elektorale të Erion Veliajt në zgjedhjet e 14 majit 2023.
Ai deklaroi se Taulant Tusha ka qenë shefi i shtabit.
Ish-deputeti denoncoi se Veliaj po tenton të shpëtojë veten nga korrupsioni me kompaninë 5 D, ndërsa tha me siguri se kryebashkiaku i Tiranës ka qenë në dijeni të gjithë allishverisheve.
“Kompania 5D ishte në duart e disa drejtorëve, që jepnin tendera tek familjarët e tyre. Kur e mora informacionin ishte në kufijtë e të pabesueshmes. Bazuar në deklaratën time të kryetarit të PD në Tiranë, SPAK ka nisur hetimet. SPAK sot ka vepruar pjesërisht. Kjo është një tjetër lëvizje e Veliajt që të shpëtojë lëkurën. Unë kam bërë dhe kallëzime të tjera. Kam denoncuar zinxhirin drejtues të Bashkisë Tiranë. Këta janë dhe drejtuesit e fushatës elektorale të Veliajt më 14 maj 2023. Shefi i shtabit ka qenë Taulant Tusha”, tha Këlliçi.
“Si ka mundësi që Veliaj nuk di asgjë se çfarë bëhet në bashki? Këtë fabul askush nuk mund ta besojë. Sot që ne flasim Bashkia Tiranë cilësohet institucioni më i korruptuar në Shqipëri, por edhe aty ka individë të ndershëm. SPAK do bënte mirë që siç ka vepruar me drejtorin e ARRSH, të veprojë dhe në këtë rast. SPAK të sekuestrojë të gjitha pasuritë e paligjshme. I njëjti standard duhet edhe për titullarët e Bashkisë së Tiranës. Kanë bërë hotel 15 milionë euro me rroga 800 mijë lekë të vjetra? Prandaj ikin qytetarët, sepse këtu bëhet hataja me vjedhje”, shtoi.
Discussion about this post