Akuzat për korrupsion kundër zëvendëspresidentes së Parlamentit Evropian, Eva Kaili janë “shqetësim i madh”, tha ditën e sotme presidentja e Komisionit Evropian Ursula von der Leyen.
“Akuzat janë shumë shqetësuese, shumë serioze,” tha ajo para gazetarëve, duke përsëritur se po propozonte gjithashtu krijimin e një organi të pavarur të etikës për të mbuluar institucionet e BE-së, raportojnë mediat e huaja.
Autoritetet greke ngrinë të hënën asetet e zëvendëspresidentes së Parlamentit Evropian, Eva Kaili, pas arrestimit të saj me akuza për korrupsion që dyshohet se kanë lidhje me Katarin, raportojnë mediat lokale.
Eva Kaili, një nga 14 nënkryetaret e organit legjislativ evropian nga partia e majtë qendrore e Greqisë PASOK-KINAL, u mbajt të premten nga policia belge pasi shtëpia e saj u kontrollua.
Sipas transmetuesit publik grek ERT, autoritetet pezulluan gjithashtu “llogaritë bankare, kasafortat, kompanitë dhe pasuritë e tjera financiare” të të afërmve të saj.
Gjithashtu, po ngrihen edhe llogaritë bankare të një kompanie pronash të paluajtshme në Kolonaki, e cila u themelua nga Kaili dhe bashkëshorti i saj, tha ERT. Katari ka hedhur poshtë akuzat “të pabaza dhe të keqinformuara rëndë” për sjellje të pahijshme që kanë tronditur Parlamentin Evropian.
Discussion about this post