Për gazetarin Klodian Tomorri përbën habi fakti që zyrtarët e Ministrisë së Financave akuzohen për shpërdorim detyre, por bazuar nga të dhënat e publikuara nga Prokuroria, nuk kanë përfituar asgjë nga 1.2 milion eurot që i kanë sjellë dëm shtetit. Në një postim në Facebook, Tomorri shkruan se Sekretari i Përgjithshëm i Ministrisë së Financave Arlind Gjokutaj akuzohet për korrupsion, por vetë s’ka marrë ryshfet. Kjo gjë, shton Tomorri me ironi, tregon se Gjokutaj e ka shkelur ligjin që të përfitojnë të tjerët.
“Ky eshte arrestimi me i cuditshem qe kam degjuar. Sipas njoftimi del se eshte arrestuar sekretari i pergjithshem i mf per korrupsion, por ai vet ska marr asnje lek. Ca stili eshte ky? Ky e shkeli ligjin qe ti merrnin leket te tjeret,”- shkruan Tomorri.
Në pranga janë vënë Sekretari i Përgjithshëm të Ministrisë së Financave, Arlind Gjokutaj, përmbaruesi Alban Ruli dhe drejtori i Ministrisë së Financave, Fatmir Hoxha.
Për çfarë akuzohen?
Bëhet fjalë për një magazinë që sipas Prokurorisë i është shitur Thanës për 1 milionë lekë nga nga drejtoria e shërbimit qeveritar në prill të vitit 1992, së bashku me një truall. Por tre vjet më vonë, komisioni i kthimit e kompesimit të pronave ia ktheu ndërtesën ish-pronarëve, një vendim i cili u mbështet edhe nga gjykata që urdhëroi kthimin e parave që blerësi kishte harxhuar në atë kohë, të konvertuara me indeksin e rritjes së çmimeve.
Kështu, Thana mori paratë në vitin 2015, por në 2022, totalisht jashtë ligjit, u krye rivlerësimi dhe me firmën e Gjokutajt, në shtator të vitit 2022, Thanës dhe motrës së tij iu kaluan 480 milionë lekë të tjera, duke i sjellë shtetit akoma më shumë dëme. Më datë 21 dhjetor 2022, Prokuroria njoftoi se kishte arrestuar Thanën e kishte vënë në sekuestro 22 milionë lekë, por dëmi i shkaktuar ndaj shtetit, kapte vlerën e 1 milion e 200 mijë eurove, duke përllogaritur kalimet e herëpashershme.
Discussion about this post