Ministri i Shëndetësisë, Arben Vitia, ka diskutuar rreth masave të reja anti-Covid, të cilat do të hyjnë në fuqi nga data 27 shtator.
Asociacioni i Komunave të Kosovës ka njoftuar se mësimi në të gjitha nivelet e arsimit parauniversitar do të fillojë me prezencë fizike, ndërkaq nëpër klasa nuk do të lejohen më shumë se 20 nxënës.Ndërsa, klasat që do të kenë më shumë nxënës do të ndahen në grupe të ndryshme.
Ndërkohë, do të ketë kufizim të lëvizjes nga ora 22.00 deri në orën 05.00 të mëngjesit.
Këto janë të gjitha masat që u diskutuan në takimin e sotëm:
Ministri Vitia informoi Kryetarët e Komunave me propozim masat e reja që pritet të hyjnë në fuqi pas datës 27 shtator 2021:
– Mësimi në të gjitha nivelet e arsimit parauniversitar do të fillojë me datën 27 shtator ku në klasa nuk do të lejohen më shumë se 20 nxënës. Në klasat me më shumë se 20 nxënës, mësimi mbahet në dy grupe.
– Institucionet parashkollore do të punojnë me kapacitete të plota,
– Kufizimi i lëvizjes vazhdon të mbetet i njëjtë, nga ora 22:00 – 05:00h.
– Gastronomia do të vazhdojë me të njëjtin orar. Lejohet puna brenda lokaleve për personat që ofrojnë dëshmi të vaksinimit ose teste përkatëse. Kjo nuk vlen për ambientet e jashtme të gastronomisë.
– Personeli i Sektorit Publik dhe Privat, të cilët kanë punë me palë, duhet të janë të vaksinuar ose të ofrojnë dëshmi për testet relevante.
Në këtë takim, nga Kryetarët e Komunave dhe përfaqësuesitë tjerë komunalë të pranishëm në këtë takim online me Ministrin e Shëndetësisë u paraqiten nevojat aktuale që janë në komunat e Kosovës.
Në të njejtën kohë, nga të gjithë u kërkua që të kenë vigjilencë në respektimin e këtyre masave për parandalim të përhapjes së virusit.
