Përzgjedhësi i Kombëtares së Kosovës, Alain Giresse, ka folur në konferencën për medie, një ditë para sfidës me Rumaninë.
‘Dardanët’ dhe rumunët do të përballen nesër mbrëma në ‘Fadil Vokrri’, në kuadër të kualifikueseve për EURO 2024.
Kjo sfidë është tejet e rëndësishme për ‘Dardanët’ pasi që vetëm fitorja na mban në garën për të siguruar një vend që dërgon në ‘Gjermani 2024’.
I pari i bankinës së Kombëtares sonë, fillimisht ka konfirmuar mungesën e Elbasan Rashanit, derisa sipas tij, në dyshim është dhe Edon Zhegrova.
“Ndodhemi në prag të dy ndeshjeve që do t’i zhvillojmë. Para kësaj loje na duhet të përballemi me dy mungesa: I pari është Elbasan Rashani që është larguar nga stërvitja dhe pastaj Edon Zhegrova që është i lënduar dhe ende nuk është rikthyer”, ka thënë Giresse.
Megjithatë, tekniku francez beson se lojtarët që do të jenë në terren do të japin më të mirën për të arritur rezultatin pozitiv.
“Nëse lojtarët tanë në mesfushë nuk kanë pasur shumë minuta nuk do të thotë që s’kanë stërvitur. Duke marrë parasysh situatën që ne ndodhemi do të përgatitemi sa më mirë dhe besoj që lojtarët do ta japin maksimumin. Pastaj zgjedhja mbetet nga rrethanat. Lojtarët janë të vetëdijshëm për rëndësinë e kësaj ndeshje. Nuk duhet të vendosim presionin para kësaj loje dhe besoj se lojtarët do të futen me dëshirën më të madhe për ta fituar këtë lojë”, ka thënë Giresse.
Ai e pranon se Rumania është skuadër e fortë, por Giresse është i bindur se të besuarit e tij, nesër mbrëma do të kenë paraqitje të mirë.
“Rumania është skuadër e mirë, kanë lojtarë individualë që e bëjnë ndryshimin, por s’do përmendi emra. Jam duke bërë më të mirën që skuadra të jetë gati për nesër”, tha Giresse.
Rrahmani: Nuk ia kemi frikën Rumanisë
Ndërkohë, kapiteni i Kosovës, Amir Rrahmani e pranon se dueli me rumunët nuk do të jetë i lehtë, por sipas tij, Kosova nuk ia ka frikën Rumanisë.
“E dimë që kjo është ndeshje direkte me ta dha dhe duhet t’i bëjmë pyetje vetes çfarë duam nga këto kualifikuese. Është ndeshje që e vendos fatin pasi me një mosfitore Rumania do ta ketë një avancim pikësh ndaj nesh dhe kundër tjerëve. Besoj që stadiumi ka me qenë plot dhe do ta kemi mbështetjen e tyre. Kemi luajtur edhe ndaj lojtarëve më të fortë, prandaj s’kemi frikë. Ne duhet të jemi ata që jemi dhe të luajmë lojën tonë”, tha Rrahmani.
Ai ka shtuar se Kosova ka mundur të fitojë edhe ndaj Izraelit dhe Andorrës, por sipas Rrahmanit, për shkak të disa gabimeve nuk u arrit fitorja.
“Kemi parë ndaj Izraelit që kemi mundur të fitojmë por shkaku i disa gabimeve. E kujtojmë atë rastin në minutat shtesë që mund të fitonim. Ndërsa edhe ndaj Andorrës mund të shënonim fitore. Ata kishin vetëm një shans dhe ne kemi pasur nevojë vetëm që të reagonim më mirë”, ka theksuar mbrojtësi kosovar.
Rrahmani e pranon se vetëm fitorja e mban Kosovën në garë për kualifikim në EURO 2024.
“Kjo ndeshje vendos gjithçka dhe në rast që humbim këtë ndeshje, atëherë jemi 99 për qind jashtë garës”, ka pohuar Rrahmani.
Kombëtarja jonë sonte zhvillon stërvitjen e fundit para duelit me Rumaninë.
Ndeshja Kosovë-Rumani fillon në orën 20:45./RTK
Discussion about this post