Kosova shënon sot Ditën Kombëtare të Personave të Zhdukur, kur edhe 24 vite pas mbarimit të luftës ende nuk dihet asgjë për fatin e 1621 personave të zhdukur me dhunë nga forcat serbe.
Në Kosovë sot me rastin e shënimit të kësaj dite do të ketë disa aktivitete.
Forum Civil Peace Service në Kosovë u ka bërë thirrje qytetarëve që për të shënuar Ditën Kombëtare të Personave të Pagjetur, më 27 prill në ora 20:30, t’i ndalin dritat nëpër shtëpitë apo banesat e tyre për 5 minuta.
Për të shënuar këtë ditë, kryeministri i Kosovës, Albin Kurti do të zhvillojë homazhe te përmendorja dedikuar personave të zhdukur me dhunë gjatë luftës.
Edhe Nisma e të Rinjve për të Drejtat e Njeriut – Kosovë (YIHR KS) përmes një aktiviteti shënon Ditën Kombëtare të Personave të Pagjetur.
Shoqata për dëme të luftës “Ngritja e zërit” prezanton dokumentarin për krime të luftës “Krimet e pandëshkuara të Serbisë 1981-1999”, me rastin e Ditës Kombëtare të të pagjeturve.
Në orët e mbrëmjes jepet shfaqja teatrore “Babai dhe Babai”. Ky aktivitet organizohet nga Ministria e Drejtësisë, Kuvendi i Kosovës dhe “Integra”, me rastin e Ditës Kombëtare të Personave të Pagjetur në hollin e Kuvendit të Kosovës.
Po ashtu, sot, me këtë datë përkujtohet edhe përvjetori i 24-të i masakrës në Mejë të Gjakovës, ku më 27 prill 1999 u vranë 376 persona.
Discussion about this post