Në Kosovë, deri të hënën në mesditë, kanë arritur 971 refugjatë afganë. Lajmin e konfirmoi për Radion Evropa e Lirë Jeta Tela, shefja e kabinetit dhe këshilltarja e lartë politike e ministrit të Punëve të Brendshme të Kosovës, Xhelal Sveçla.
Bëhet e ditur se 810 refugjatë janë vendosur në kampin Bechtel-Eenka në Ferizaj, kurse 161 në kampin Bondsteel, po ashtu në Ferizaj.
Shtetasit afganë do të qëndrojnë në Kosovë derisa t’iu rregullohet dokumentacioni për t’u vendosur në Shtetet e Bashkuara apo në ndonjë shtet tjetër anëtar të NATO-s. Ata kanë ikur nga Afganistani pasi ky vend ka rënë nën kontrollin e militantëve talibanë, më 15 gusht.
Shumica e tyre kanë punuar në cilësi të ndryshme për ushtrinë amerikane dhe forcat e tjera aleate të NATO-s dhe tani kërcënohen nga talibanët.
Forcat ndërkombëtare, që kanë operuar në Afganistan në 20 vjetët e fundit, janë tërhequr nga ky vend në fund të gushtit. Kosova pritet të strehojë gjithsej rreth 2,000 shtetas afganë.
