Komisioni Qendror i Zgjedhjeve ka miratuar rezultatin e zgjedhjeve të 14 Majit për Bashkinë e Tiranës dhe atë të Durrësit.
Kështu, kryekomisioneri Ilirjan Celibashi deklaroi se Erion Veliaj është zyrtarisht kandidati fitues për Bashkinë e Tiranës, duke treguar edhe votat e vlefshme që ka marrë secili nga kandidatët në garë.
“Miratojmë rezultatin e votimit për kryetar të bashkisë së Tiranës me të dhënat vijuese. Fletë votimi të gjetura në kuti 302 695, vota të pavlefshme 11 939, fletë votimi gabim 339.
Vota të vlefshme janë 290 446 të ndara sipas kandidatëve, Arlind Qori 13851 vota, Marko Dajti 2809. Lajla Përnaska 2107, kandidati fitues 158 856,për zotin Belind Këlliçi 100 425 dhe nga zoti Roland Bejko, 12 398 vota. Miratojmë edhe tabelën përmbledhëse për votim për anëtarë të këshillit”, tha ai.
Celibashi certifikoi edhe Emirjana Sakon, si kandidate fituese për Bashkinë e Durrësit, përballë kandidatit të “Bashkë Fitojmë”, Igli Cara.
Sako ka siguruar fitore me 9721 vota diferencë. Ajo mori 55.57% të votave ose 48451, krahasuar me 44.43% të votave që mori Cara ose 38743. Sa i përket garës për këshilltarë PS ka marrë 28 mandate ose 50.56%, BF ka marrë 13 mandate ose 24.54%, PD renditet e treta me 5 mandate ose 9.35%. PAA e Agron Dukës me 6.20% ose 1 mandat dhe 2.70% ka marrë PSD e Tom Doshit.
Discussion about this post