Kryetari i ri i PDK-së Memli Krasniqi ka mbajtur një fjalim pas zgjedhjes së tij si kryetar. Telegrafi shkruan se Krasniqi në fjalën e tij ka falenderuar delegatët që e kanë votuar si dhe është shprehur se besimin e tyre do të shpërblejë me punë të pandalshme.
“Gjatë rrugës për rikthimin e PDK-së aty ku e ka vendin në udhëheqjen e shtetit, padyshim që do të kemi shumë sfida e pengesa, nuk do të jetë e lehtë por e njoh shpirtin dhe vullnetin që buron nga secili prej jush dhe duke u bazuar në këtë energji të pashtershme jam i sigurt që do ia dalim”, tha Krasniqi pasi u zgjodh kryetar i PDK-së.
Më tej, Krasniqi është shprehur se është i ndërgjegjshëm për barrën dhe për përgjegjësinë që ai mori ditën e sotme si kryetar i PDK-së.
“Kanë qenë edhe gabimet tona, që i kanë kontribuuar kësaj situate… Se si duhet të operojë sot PDK, mbi këtë situatë politike, duhet të flasim hapur për disa gjëra, e të mendojmë nga e ardhmja. Ne sot jemi opozitë. Kanë qenë edhe gabimet tona, që i kanë kontribuuar kësaj situate. Ndoshta s’kemi mundur ta lexojmë krejt saktë disponimin e votuesve, prandaj edhe në dy palë zgjedhjet e fundit nuk kemi marrë mjaftueshëm mbështetjen e tyre. Reflektimi është i domosdoshëm. Nuk mund të vazhdojmë edhe më tutje njëjtë”, u shpreh Krasniqi.
