Krerët e partive opozitare në Kosovë, Memli Krasniqi, Lumir Abdixhiku dhe Ramush Haradinaj, janë takuar këtë të mërkurë.
Kryetari i Partisë Demokratike të Kosovës, ai i Lidhjes Demokratike të Kosovës, dhe i Aleancës për Ardhmërinë e Kosovës, u takuan për të pirë kafe teksa biseduan për ngjarjet aktuale në vend. Këtë takim e konfirmoi zëdhënësi i PDK-së, Faton Abdullahu, i cili edhe tregoi arsyet e takimit.
“Kryetari Krasniqi ka diskutuar me Abdixhikun dhe Haradinaj për fillimin e sesionit vjeshtor të Kuvendit të Kosovës dhe për nevojën që të ketë diskutim për çështjet aktuale, përfshirë çështjen e pandemisë, duke u nisur edhe nga qëndrimi që ai ka shprehur edhe në letrën dërguar kryeministrit Kurti”, tha Abdullahu.
