Deputeti i Partisë Demokratike njëkohësisht dhe kryetari i Komisionit të Edukimit dhe Medias në Kuvend, Agron Gjekmarkaj ka reaguar për krijimin e një agjencie për mediat dhe informimin.
Sipas tij, ky është një instrument i ri propagande, kontrolli dhe shantazhi. Gjekmarkaj thotë se Rama po ndërton kolonat ku mbahet tempulli i gënjeshtrave.
“Në fund të fundit po bën atë qe di më mirë -po nderton kolonat ku mbahet tempulli i gënjeshtrave të tij! Është në të drejtën e tij si korruptues dhe kontrollues i lirisë se fjalës dhe demokracisë në këtë vend ta bëjë këtë siç është në të drejtën e saj opozita e Shqipërisë për të mbrojtur lirinë e fjalës , punëtoret e saj, mediat nga shantazhi e presioni e vendosur më shumë se kurrë për çdo beteje në mbrojtje të fjalës së lirë” – thotë Gjekmarkaj.
Me ngritjen e kësaj strukture, Gjekmarkaj thotë se shtohet një tjetër armik dhe agresorë.
“Sot Opozita ka shume armiq dhe agresore, shoqëria gjithashtu , liritë dhe shpresat po kaq , një i ri u shtua me “agjencinë” ! Shumë armiq shumë nder ! Beteja për sundimin e ligjit kundër sundimtarëve nuk do të ndalet, nuk do të blihet, nuk do të mposhtet ! Ajo do të triumfojë ! Historia e progresit njerëzor na e jep këtë leksion” – thotë Gjekmarkaj.
Theksojmë se një nga vendimet e marra sot në mbledhjen e Këshillit të Ministrave që qeveria e re e Shqipërisë ka publikuar është krijimi i Agjencisë për Media dhe Informim. Mesa duket pas ATSH, TVSh, Edi Rama ka vendosur të krijojë një tjetër agjenci, për të reklamuar aktivitetet, projektet apo eventet që organizon qeveria e tyre.
