Rastet e fundit të krimit seksual të raportuara në vend, ngrenë kambanën e alarmit, pasi është kthyer në një fenomen dhe askush nuk po ndërgjegjësohet.
Në një intervistë për gijotina.com psikologia Fatjona Halili, rendit disa faktorë që ndikojnë në rritjen e rasteve të abuzimit seksual në vend.
Ajo shprehet se abuzimi ndaj fëmijëve, do të parandalohet kur shkolla të monitorojë dhe apo raportojë këto raste, që shkatërrojnë jetën e një të mituri apo adoleshenti.
“Për fat te keq shkollat ende vazhdojnë të mos raportojnë raste të ngacmimeve seksuale ndaj fëmijëve apo dhe dhunë në familje, çka shkatërrojnë, jetën dhe të ardhmen e fëmijëve. Shkolla si institucion duhet të punojë ngushtë me aktorët e saj brenda shkollës dhe me instancat përkatëse që nga njësia për mbrojtjen e fëmijës deri në bashkëpunimin me policinë e shtetit”, deklaron ajo.
Poashtu Halili, shprehet se një fëmijë bie pre më lehtë e abuzimit seksual kur ndodhet në kushte të vështira ekonomike, që shtyhen të punojnë në moshë të hershme, fëmijët që kanë vetëvlerësim të ulët, që shoqërohen me persona më të rritur, apo komunikimi i dobët me familjarët.
“Kushtet ekonomike janë 1 ndër indikatorët kryesorë që një fëmijë bie pre e dhunës, ngacmimit seksual apo dhe trafikimit të qenieve njerëzore. Në të tilla raste shkolla bashkëpunon me njësinë e mbrojtjes së fëmijëve, ku i paraqit riskun e këtij fëmije, në këtë rast bëhet një analizë. Fëmijët që bien pre e një abuzimi seksual janë, ata fëmijë që vijnë nga familje me ekonomi të ulet. Fëmijët që shtyhen të punojnë në moshë të hershme, mungesa e llogarisë nga ana e prindërve, përdorimi i gjatë dhe qëndrimi deri në orët e vona në internet, fëmijët që kanë vetëvlerësim të ulët, të distancuar nga shoqëria, të bullizuar, fëmijët që shoqërohen me më të rritur sesa vetja, komunikimi i dobët me familjarët”, shton Halili.
Hapat e menaxhimit për mbrojtjen e fëmijës së abuzuar
Hapat e menaxhimit të rastit të mbrojtjes së fëmijës së abuzuar, në nevojë për mbrojtje: Identifikimi, Raportimi, Vlerësimi fillestar, Vlerësimi i plotë, Hartimi i planit individual të mbrojtjes, Zbatimi, ndjekja dhe monitorimi i plani sigurie, Mbyllja e rastit.
Ndër të tjera psikologia në një intervistë për gijotina.com bën me dije se mos angazhimi nga ana e institucioneve, organizatave dhe shtetit ka sjellë rritjen e rasteve të abuzimit seksual dhe dhunës së fëmijëve në Shqipëri. Këta të fundit sipas saj duhet se gëzojnë të drejtat e tyre, të drejtën për tu rritur shëndetshëm, të lirë nga çdo formë dhune, abuzimi apo shfrytëzimi.
“Mbrojtja e fëmijëve nga abuzimi është domosdoshmëri nga çdo shtet, shkollë, institucion, familje apo çdo organizate në mënyrë që të sigurohemi që fëmijët nuk dëmtohen apo lëndohen. Por rastet e abuzimit thënë edhe nga raportet janë rritur, marrë shkas edhe nga ato më të fundit që janë shënuar në vend, kjo pasi këto instanca nuk janë angazhuar siç duhet. Fëmijët duhet të mbrohen nga abuzimet sepse ato gëzojnë të drejtat e tyre, të drejtë për tu rritur shëndetshëm, të lirë nga çdo forme dhune, abuzimi apo shfrytëzimi”, ka përfunduar ajo.
Discussion about this post