Nisin procedurat për paraqitjen e kandidaturave për drejtuesin e ri të Prokurorisë së Posaçme kundër Korrupsionit dhe Krimit të Organizuar. Vendimi është marrë nga Këshilli i Lartë i Prokurorisë. Në një njoftim për mediat, KLP thekson se të gjithë kandidatët që duan të marrin pjesë në garë, duhet të paraqesin një platformë.
Ja dhe kriteret që duhen plotësuar nga prokurorët:
- Eksperiencën në ndjekjen e çështjeve sensitive të korrupsionit dhe krimit të organizuar;
- Eksperiencën dhe aftësitë në organizimin dhe drejtimin e një strukture;
- Eksperiencën në hartimin e miratimin e rregulloreve administrative;
- Eksperiencën në çështje të cilat kanë marrë vëmendje të lartë publike, dhe ndërveprim me median;
- Aftësitë në drejtimin efektiv të burimeve njerëzore;
- Vizionin ose planin e besueshëm për organizimin e Prokurorisë së Posaçme si një institucion funksional dhe efektiv;
- Imazhin publik të karrierës së tij/saj si prokuror;
Sipas njoftimit të KLP-së, kandidatët e interesuar duhet të paraqesin dokumentacionin dhe platformën deri më datë 2 nëntor 2022, ora 24:00.
Kujtojmë se kreut aktual të SPAK, Arben Krajës i përfundon mandati 3-vjeçar në 19 dhjetor. Në këtë datë merr detyrën edhe drejtuesi i ri ndërsa Kraja mbetet prokuror i SPAK, pasi si prokuror mandati është 9 vite ndërsa si drejtues zgjidhet çdo 3 vite.
Discussion about this post