Presidentja e Kosovës, Vjosa Osmani, në një deklaratë për mediet ka folur në lidhje me Raportin e Progresit të përpiluar nga Komisioni Evropian për vendet e Ballkanit Perëndimor përfshirë edhe Kosovën.
Osmani, gjatë fjalës së saj tha se si presidente e vendit, nuk pajtohet me pjesën e raportit ku thuhet se vetingu paraqet një burim shqetësimi serioz.
Sipas saj mos realizimi i këtij vetingu nuk i kontribuon përpjekjeve të Republikës së Kosovës për garantim dhe sundim të ligjit.
“Sa i përket vetingut Komisioni Evropian ka konstatuar se vlerësimi i plotë dhe i njëhershëm i të gjithë prokurorëve dhe gjyqtarëve paraqet një burim shqetësimi serioz. Si presidente e vendit nuk pajtohem fare me këtë konstatim, në fakt mungesa e vetingut do të ishte shqetësim serioz, e jo përmbushja e këtij procesi. Mos realizimi i këtij vetingut nuk i kontribuon as përpjekjeve të Republikës së Kosovës për garantim dhe sundim të ligjit”, ka thënë ajo.
Osmani shtoi tutje se vetingu është i domosdoshëm dhe mënyra e vetëm për të arritur të gjithë ato kërkesa që ka kërkuar Bashkimi Evropian.
Po ashtu, gjatë konferencës Osmani tha se Komisioni Evropian ka konfirmuar se situata në veri është sfiduese sa i përket korrupsionit e krimit të organizuar.
“Komisioni Evropian konfirmon se situata në veri të vendit është sfiduese sa i përket korrupsionit, krimit të organizuar dhe mungesës së lirisë së shprehjes, kjo situate sipas komisionit paraqet sfidë. Ne kërkojmë nga të gjithë zyrtarët e BE-së të i qëndrojnë besnik këtyre deklaratave në mënyrë që sa herë institucionet e Kosovës luftojnë krimin dhe korrupsionin, ta kemi përkrahjen e tyre, dhe jo kundërshtimin”, u shpreh ajo.
Ditën e djeshme, Komisioni Evropian në raportin e fundit të vitit 2021 për Kosovën vlerësoi se sa i përket disa opsioneve që qeveria Kurti ka propozuar lidhur me procesin e vetingut siç është rivlerësim i plotë dhe i njëhershëm i të gjithë prokurorëve dhe gjyqtarëve paraqet një burim shqetësimi serioz.
