Kriza e bukës, Ukraina nis anijen e parë humanitare me grurë drejt Afrikës

Pas marrëveshjes së firmosur me Rusinë në Stamboll, Ukraina ka vazhduar të eksportojë drithëra në vende të ndryshme të botës. Mësohet se në kuadër të programit të OKB-së për të ndihmuar vendet që përballen me rrezikun ndaj urisë, Ukraina ka nisur një anije të ngarkuar me 23 mijë tonë drithë nga porti i Detit të Zi drejt Etiopisë.

Sipas Ministrisë së Infrastrukturës së Ukrainës. Sipas raportimeve të mëparshme që citonin një guvernator rajonal thanë se anija ishte nisur më 14 gusht. Megjithatë, anija në fakt qëndroi në port për arsye të paparalajmëruara.

Anija do të lundrojë për në portin e Xhibutit, ku drithi do të shkarkohet dhe do të transferohet në Etiopinë fqinje nën iniciativën e Programit Botëror të Ushqimit (ËFP).

“Ministria e Infrastrukturës dhe Kombet e Bashkuara janë duke punuar në mënyrë që të rrisin furnizimet ushqimore për seksionet sociale të cenueshme të popullsisë afrikane”, thuhet në deklaratën e ministrisë.

Eksportet e drithërave të Ukrainës u pezulluan pasi Rusia pushtoi vendin dhe mbylli portet e Detit të Zi, duke rritur çmimet globale të ushqimeve dhe duke ngritur shqetësime për mungesat e mundshme në Afrikë dhe Lindjen e Mesme.

OKB-ja dhe Turqia ndërmjetësuan një marrëveshje në fund të korrikut që i ka lejuar Ukrainës të rifillojë eksportin e grurit përmes porteve të saj të Detit të Zi, pavarësisht luftës me Rusinë.

Sipas Programit Ushqimor Botëror, dërgesa përbënte “një moment të rëndësishëm” në përpjekjet për të eksportuar drithin ukrainas jashtë vendit dhe në vendet më të prekura nga kriza globale e ushqimit.

“Hapja e porteve të Detit të Zi është gjëja e vetme më e rëndësishme që mund të bëjmë tani për të ndihmuar të uriturit në botë”, tha drejtori ekzekutiv i ËFP-së, David Beasley.

“Do të duhen më shumë se anijet e drithit nga Ukraina për të ndalur urinë në botë, po të paktën me rikthimin e grurit ukrainas në tregjet globale, ne kemi një shans për ta ndalur këtë krizë globale të ushqimit që të rritet edhe më tej”, shtoi ai.

Që nga marrëveshja e 22 korrikut, deri më tani 17 anije janë nisur nga portet e Ukrainës me më shumë se 475.000 ton produkte bujqësore.