Një incident aspak i zakontë është regjistruar në stadiumin “Air Albania”, ku është ndërprerë ndeshja e vlefshme për javën e 5-të të Abissnet Superiore. Ndeshja mes Partizanit e Kukësit u ndërpre për shkak të shkëputjes së ndriçimit. Lojtarët u detyruan të dalin për disa minuta nga fusha deri sa ky problem të zgjidhej. Siç duket edhe në videon e siguruar, ky incident u shoqërua dhe me reagimet e tifozëve të pranishëm në stadium.
Ndeshja rifilloi sërish pas disa minutash, por konkretisht nuk dihen arsyet e shkëputjes së ndriçimit.
Me sa duket, kriza energjetike ka nisur pikërisht nga ky impiant modern.
Kujtojmë këtu që vendi ynë hyri në situatën e emergjencës energjetike, e cila do të zgjasë deri në prill 2022. Më 8 tetor, kryeministri Rama shpalli krizën energjetike pas një mbledhje të Këshillit të Ministrave. Sipas Ramës, ai vendim u mor për shkak të rritjes marramendëse të çmimit në tregjet ndërkombëtare jep qeverisë mundësinë që të ndërhyjë qoftë me instrumente financiarë, qoftë edhe me instrumente të natyrës administrative.
“Synimi i qeverisë është të mbrojë konsumatorët, me një rend prioritetesh nga poshtë lart, nga ata që janë më në nevojë e duke vajtur më lart, përmes biznesit të vogël dhe më tej atij të madh”, shprehej kryeministri.
