Energjia elektrike është kryetema e cila po diskutohet përgjatë gjithë këtyre kohëve, kjo për shkak edhe të krizës në vend. Në lidhje me të, ka folur ditën e sotme dhe Ministrja e Energjisë, Belinda Balluku. Ajo ka pohuar se do të vihet në dispozicion energjia inteligjente, e cila fillimisht do të aplikohet në 4 bashki, për të shmangur shkëputjet.
Sipas Ballukut bëhet fjalë për vendimin e miratimit të marrëveshjes të SECO-s zvicerane dhe këshillit të ministrave në mbështetjen e bashkive në energjinë inteligjente. Projekti lidhet me eficencën e energjetike dhe padyshim edhe me kursimin që duhet treguar në fushën energjetike, pas krizës në botë, madje dhe në vendin tonë. Kjo është një mënyrë e cila do të bëjë mbrojtjen e konsumatorit familjar dhe bizneseve të vogla nga çdo lloj ndikimi që mund të ketë tregu energjetik në këto momente.
“Kemi informuar që përveç politikave të çmimit, sot vështirësia më e madhe që ne hasim është gjetja e sasive energjetike për t’i ofruar të gjithë tregut pa dallim qoftë edhe konsumatorëve të tensionit të mesëm dhe të lartë të cilët preferojnë të shërbehen nga OSHEE-ja edhe sot pavarësisht se ata kanë dalë prej disa kohësh në tregun e lirë dhe ne kemi deklaruar dhe kemi marrë përgjegjësinë të vazhdojmë të ofrojmë 24 orë energji elektrike pa shkëputje në të gjithë vendin, duke qenë se sot rrjeti i shpërndarjes me të gjitha investimet që janë bërë e mundëson këtë por ne po bëjmë të gjitha përpjekjet që të mos kemi mungesave të sasive energjetike pasi edhe moti në këto kohë nuk po ndihmon”, është shprehur Balluku. Gjithashtu bëhet thirrje për kursim të energjisë dhe përdorim me eficencë të saj, ndaj ky projekt do të aplikohet fillimisht në 4 bashki. “Duke filluar nga ndriçimi i rrugëve, mënyra se si mund të ushqehen makinat hibride që sot furnizohen me energji elektrike, por edhe përdorimi në ujësjellës, zyra apo zonat e pushtetit vendor dhe më pas në shkolla apo spitale. Po punojmë për të siguruar të gjitha sasitë e nevojshme për të furnizuar tregun me energjinë elektrike”, ka përfunduar ministrja.
