Temperaturat e larta në muajt e fundit kanë krijuar thatësira të shumta në vend dhe si pasojë Fierza rrezikon të thahet. Bëhet me dije se, mungesa e reshjeve për një kohë të gjatë ka ulur ndjeshëm prurjet në kaskadë, ndërsa që prej datës 21 gusht të gjitha nevojat e vendit për energji po plotësohen nga prodhimi vendas. Kjo pasi në bursë çmimi i energjisë elektrike ka arritur rekord ditët e fundit duke tejkaluar edhe 700 euro për megavat/orë në disa orare piku. Nisur nga kjo KESH kishte anuluar të gjithë tenderat e hapur për të blerë energji. Por, ditën e sotme Korporata Elektroenergjitike është detyruar të rihap procedurën për të blerë energji elektrike për periudhën 29 gusht deri në 4 shtator.
Sipas të dhënave të tenderit kërkohet të blihet rreth 4200 mwh energji elektrike, sasi që do të përdoret për të plotësuar kërkesat e konsumatorëve në vend. Për të përballuar vështirësitë qeveria shqiptare ka miratuar një fond prej 165 mln euro në mënyrë që KESH të blejë energji deri në fund të këtij viti.
Discussion about this post