Një ditë pasi paralajmëroi se ditë të vështira e presin vendin, kryeministri Edi Rama ka reaguar duke përhapur sërish panik tek qytetarët se çmimet do të rriten dhe se qeveria nuk ka çfarë bën.
Rama shkruan në Facebook se ne nuk e prodhojmë vetë sasinë e energjisë që na duhet, duke e gjetur justifikim tek reshjet e shiut dhe borës që nuk kanë qenë të mjaftueshme. Sipas tij, çmimet do vazhdojnë të rriten si pasojë e luftës në Ukrainë, ndërsa nuk thotë asnjë fjalë për uljen e taksave siç kanë vepruar vendet e rajonit.
“Shqipëria nuk e prodhon ende dot të gjithë sasinë e energjisë që i nevojitet. Prodhimi ynë varet nga reshjet e shiut e të borës, të cilat për vitin e tretë rresht janë shumë më të ulëta se sa deri tri vite më parë! Thatësira çon deri në pikën që thuajse gjysma e nevojave për energji të mbulohet nga importi, ndërkohë që prej disa muajsh bota ka hyrë në një krizë energjetike. Tanimë edhe për shkak të luftës në Ukrainë, çmimi për megavat vazhdon të rritet çmendurisht, orë e çast, nga 52 euro vjet në 550 euro aktualisht! Gjasat janë që rritja marramendëse të vazhdojë dhe parashikimet shkojnë deri në çmendurinë totale të 1000 eurove për megavat orë! Qysh me shfaqjen e shenjave të krizës energjetike disa muaj më parë, qeveria ka paralajmëruar kohë të vështira përpara dhe ka vendosur një mburojë financiare për familjet dhe biznesin e vogël”, shkruan Rama.
Ndërsa çmimet rriten dhe nafta ka shkuar në 260 lekë brenda natës, Rama ironizon qytetarët duke u tallur dhe thënë se duhet ta përballojmë kurajo. Me siguri e ka fjalën për të njëjtën kurajo me të cilën udhëton me charter në Dubai me taksat publike, ndërsa qytetarët luftojnë për mbijetesë.
Discussion about this post