Kriza energjitike detyroi qeverinë Rama të marrë masa për të shkurtuar shpenzimet publike të cilat nuk ishin të domosdoshme por KESH-i ka bërë të kundërtën duke hapur tenderin me vlerë 1,6 milionë euro pa TVSH me numër REF-25496-04-15-2022.
Në këtë tender parashikohet krijimi i programit të menaxhimit të aktivitetit të operimit tregtar e cila në gjuhën e thjeshtë është tender për blerjen dhe shitjen online të energjisë elektrike pasi jemi në gjendje të jashtëzakonshme.
“Në kushtet e mësipërme dhe ku prioritet ka sigurimi i energjisë elektrike me kosto sa më të ulët është e nevojshme që procesi i blerjes së energjisë elektrike të bëhet me sistem elektronike, kjo me qëllim kapjen në kohë më të shpejtë të sinjaleve të tregut të energjisë elektrike si dhe rrjedhimisht uljen e kostove për blerje energjie elektrike”, shkruhet tek shpallja e njoftimit për të justifikuar një program që do përdoret për 12 muaj.
1,9 miliardë lekë të vjetra pa TVSH janë një shumë e madhe dhe para disa ditësh KESH-i ka pranuar thirrjen e kompanive “Exelerate Energy”, me seli ne SHBA dhe “Renco spa”, me seli ne Itali për të prodhuar energji elektrike nga anijet në portin e Vlorës ku ish-drejtues të Renco spa në artikullin ekskluziv të publikuar nga Gijotina.com rezultonin të dënuar dhe CEO aktual, Giovanni Rubini ka qënë nën përgjim në çështjen e “MAFIA CAPITALE” në Itali.
Por këto gjëra nuk e kanë shqetësuar drejtuesin aktual të KESH, drejtorin Ergys Verdho i cili vazhdon të prodhojë tendera të kushtueshëm në një kohë që vendi gjendet përballë krizës ekonomike.
KESH mund të deklarojë që është e domosdoshme por natyrshëm lind pyetja, kaq vite nuk e kanë patur një program që bënte menaxhimin e aktivititetit tregtar? Si shpjegohet që në raste të jashtëzakonshme shpërthejnë shpenzimet por efikasiteti i tyre? Mjafton të shikoni procesin e Rindërtimit dhe rezultatin ku pjesa më e madhe e banorëve nuk kanë marrë akoma shtëpitë.
Pyetja tjetër është më specifike, si mund ti besohet një ndërmarrjeje shtetërore e cila nuk ka deklaruar bilancet financiare, që shkel ligjin? Pra, ne nuk dimë se sa fitime ka patur KESH, sa humbje dhe se si pasqyrohen këto ndërkohë që në mënyrë groteske qeveria akuzon qeveritë e kaluara për gjendjen e mjeruar me rezervat energjitike.
Nuk ka dyshime që ka patur korrupsion në të kaluarën por qeveria Rama ka 9 vjet me KESH, mund të luftonte korrupsionin që ka përpirë administratën dhe të shpjegojë se pse shpenzimet për mirëmbajtjen e rrjetit të energjisë elektrike janë në rritje ndërsa humbjet në rrjet vazhdojnë të qendrojnë të larta, madje hera-herës më të larta.
Discussion about this post