Drejtori i të ashtuquajturës zyrë për Kosovën në Qeverinë e Serbisë, Petar Petkoviç, tha se krizat e fundit në veri të Kosovës ishte një plan i paramenduar nga Kurti për të fituar “disa poena politikë”.
Petkoviç thotë se është rritur numri i incidenteve të drejtuar kundër serbëve, sepse sipas tij aktivitetet antiserbe të autoriteteve të Prishtinës janë intensifikuar.
“Është shtuar numri i incidenteve të drejtuara kundër serbëve, sepse retorika antiserbe dhe aktivitetet antiserbe të autoriteteve të Prishtinës janë intensifikuar”, ka thënë ai, duke shtuar se “është i gjithi plan i Kurtit që të krijojë kriza me paramendim për të fituar disa poena politikë”.
Petkoviç, duke i përsëritur fjalët e presidentit serb, Aleksandar Vuçiç, tha se KFOR-i është i obliguar “ta mbrojë popullin serb në përputhje me Rezolutën 1244”.
“Nëse ata nuk duan, ka nga ata që duan. Ky është viti 2021 dhe sot Serbia është shtet i pavarur, sovran, i cili po forcohet çdo ditë, në të gjitha fushat. Ne nuk do të lejojmë dhe nuk mund të tolerojmë poshtërime dhe sulme fizike të drejtuara kundër popullit serb”, tha Petkoviç.
Në marrëveshjen me afat gjashtëmujore, për të cilën u ra dakord nga kryenegociatorët e Kosovës dhe Serbisë, 21 tetori është përcaktuar si një datë ku do të fillonte puna për gjetjen e një zgjidhje të përhershme për çështjen e njohjes së targave të automjeteve. Grupi i punës synon të gjejë një zgjidhje të përhershme dhe pritet të takohet rregullisht.
