Për situatën e krijuar në qytetin e Krujës pas helmimit të qindra banorëve nga uji i pijshëm, kryetari i degës së PD në këtë qytet, Sabah Sheta, ka ngritur një shqetësim tjetër.
Në një postim në facebook, ai thotë se krutanët po përballen me një problem tjetër që është ai i mungesës së ujit për punët e përditshme, pasi që ditën kur në spital u paraqitën qytetarët me simptoma, uji është ndalur nga UKK.
Ai gjithashtu u bën thirrje të gjithë institucioneve shtetërore që ta lëshojnë ujin për përdorim të përditshëm.
“Me shqetësim të madh po ndjekim hap pas hapi situatën kaotike qe po ndodh me helmimin e qytetarëve të Krujës nga uji i pijshëm, por tani na shtohet dhe një hall tjetër për këto familje dhe qytetare, mungesa e ujit nga 3 ditë, mirë që njerëzit po i mundon helmimi i këtyre njerëzve të pashpirt dhe kriminele, po as ujë për t’u larë nga të vjellat dhe diaret që i shkaktuan këto nuk kanë!
I bej thirrje urgjente të gjithë institucioneve shtetërore që kanë përgjegjësi për këtë masakër që po i bëhet qytetarëve, i kanë të gjitha mundësitë e informimit të qytetarëve për mos të përdorin ujin për pirje dhe për përdorim në ushqim, se këto të pashpirt i kanë të gjitha pushtetet dhe informatorët (patronazhistët) që t’i lajmërojnë të gjitha familjet. Lëshoni ujin të lahen njerëzit nga kjo e keqe e madhe” – shprehet Sheta.
Më tej kreu i PD Krujë, thotë që në rast se institucionet nuk do të marrin masat për këtë shqetësim të dytë, ai bashkë me qytetarët do ta marrin vet situatën në dorë për të menaxhuar situatën.
“Ose un i pari si qytetar i Krujës dhe ftoj të gjithë qytetarët të bashkohemi dhe të marrim fatin e qytetit në dorë, të shkojmë ta hapim vetë ujin sepse i ka Kruja të gjithë specialistët e ujit që ta menaxhojnë jo me militantë, por me specialist të mirëfilltë që janë hequr nga puna dhe janë zëvendësuar me militantë. I bej thirrje dhe njëherë Kryetarit të Bashkisë, drejtorit të ujësjellësit të lëshojnë ujin sa nuk është vonë, sepse nuk merren analizat e ujit tani po ligjërisht analizat e ujit merren çdo ditë para se t’i jepen qytetarëve, po i kujtoj dhe të gjithë institucioneve ligjzbatuese mos të bëhen pakt me të keqen se ka një Zot lartë që do iu gjykojë dhe pse mendoni që keni kapur gjithë pushtetet. Do ju gjykojë nëpër familjet tuaja e gjithë vuajtja e fëmijëve dhe qytetarëve të Krujës” – shkruan Sabah Sheta.
Kujtojmë se të paktën 500 persona me simptoma helmimi janë paraqitur në spitalin e Krujës. Dyshohet se ata u helmuan nga uji i pijshëm. Mbi 80% e popullatës në Krujë konsumon ujin e çezmës në përditshmërinë e tyre.
