Kryebashkiaku i Tiranës, Erion Veliaj paraqitet në SPAK

Kryebashkiaku i Tiranës, Erion Veliaj paraqitet në SPAK.

Nga informacionet paraprake thuhet se pas bashkëshortes Ajola Xoxa do pyetet dhe kryebashkiaku mbi hetimet e nisura për pasurinë dhe transaksione të dyshimta.

Po ashtu, ai është akuzuar nga nga opozita për korrupsion dhe vjedhje të parave publike, ku nuk kanë munguar edhe denoncimet e shumta ndaj tij në Prokurorinë e Posaçme.

Hetimet po ndiqen nga prokurori Olsi Dado. Referuar raportimeve mediatike, SPAK ka indicie se Erion Veliaj dhe të afërmit e tij janë implikuar në skemat e përfitimit të parave në rrjetin e kompanive që ka në pronësi biznesmeni shqiptaro-belg Elman Abule. Ndaj këtij të fundit ka dhe një hetim nga Prokuroria e Tiranës, ku akuzohet se ka ngritur një skemë të pastrimit të parave, ku është pjesë bashkëshortja e tij bashkë me Kristian Boçin dhe Vladimir Avramin.

Prokuroria u bllokoi rreth 50 milion euro pasuri që ishte investuar kryesisht në ndërtim, pasi paratë kishin origjinë të dyshimtë. Por sekuestro u hoq disa ditë më vonë kur prokurorja e Apelit, Arta Marku u riktheu pronat të akuzuarve.

Mëngjesin e 6 Dhjetorit, agjentët e BKH-së me urdhër të SPAk ushtruan kontrolle në 6 individë, mes të cilëve dhe Ajola Xoxa dhe Arbër Veliaj, bashkëshortja dhe vëllai i kryebashkiakut të Tiranës.

Kontrollet u ushtruan në zyrat e galerisë “Harabel”, fondacion i themeluar në vitin 2018 nga artisti Driant Zeneli dhe “promotorja kulturore” Ajola Xoxa. Gjithashtu, kontrolle u ushtruan edhe në shtëpinë e prindërve të Xoxës, fakt ky i pranuar edhe nga Erion Veliaj në një reagim publik mbi hetimet.

Veç kontrolleve, SPAK urdhëroi dhe sekuestrimin e telefonit të Ajola Xoxës dhe Arbër Veliajt.

Ditën e djeshme, Gjykata e Posaçme e Apelit rrëzoi ankimin e bërë nga Ajola Xoxa dhe Arbër Veliaj, të cilët kundërshtonin veprimet e SPAK dhe GJKKO, në lidhje me kontrollin e ushtruar mëngjesin e 6 Dhjetorit

Pak ditë më parë, GJKKO refuzoi dhe kërkesën e tyre për t’ju kthyer sendet e sekuestruara nga SPAK gjatë kontrollit personal dhe disa ambienteve në pronësi të tyre.

Ndërkohë, tre ditë më parë në SPAK u paraqit dhe bashkëshortja e Veliajt, Arjola Xoxa, e cila dëshmoi për rreth 3 orë para oficerëve të byrosë kombëtare të hetimit.