Akuza dhe sulme të ashpra në publik dhe biznes në fshehtësi. Kjo është ajo që ndodh rëndom mes rivalëve politik në realitetin shqiptar. Dokumente të publikuara në media këtë të martë ngrenë dyshime se e tillë është marrëdhënia mes bashkëshortores së kreut të PL-së, Monika Kryemadhi dhe kryebashkiakut të Tiranës, Erion Veliaj.
Akuzat publike
Mes palëve, janë shkëmbyer akuza publike të ashpra. Këshilltarë të Partisë së Lirisë dhe kryetari i saj kanë kërkuar dorëheqjen e Veliajt dhe arrestimin e tij në protestat javore që zhvillohen tashmë prej një muaji para Bashkisë së Tiranës. Të ashpra kanë qenë edhe përgjigjet e kryebashkiakut.
Më herët gjatë ditës, Monika Kryemadhi, përmes një reagimi në rrjetet sociale, u shpreh se ishte denoncimi i LSI-së që çoi Veliajn këtë të martë në dyert e SPAK.
“Është ky standard i ri që vendosëm bashkërisht për mënyrën se si hetohet korrupsioni qeveritar, e cila ka bërë që Erion Veliaj, nga zyrtar i maxhorancës i cili kërcënonte në emër të drejtësisë, të shkojë sot e të përgjigjet para SPAK për abuzimet e tij”, shkroi deputetja e PL-së dhe ish-kryetarja e kësaj force politike kur emërohej LSI.
“E drejta vonon por drejtësi do të ketë një ditë! Unë do të vazhdoj luftën dhe falenderoj çdo njeri që kontribuoi për këtë ditë ku muri i madh mbrojtës për pandëshkueshmërinë e qeverisë së inceneratorëve, u ça”, shtoi ajo, duke publikuar edhe shkresën përmes së cilës Veliaj shpreh dakordësinë në parim për ndërtimin e inceneratorit të Tiranës – i shndërruar më pas në “aferën e shekullit”.
Pazare në fshehtësi?
Megjithatë, pavarësisht akuzave, një dokument i nxjerrë nga sistemet e Kadastrës, ngre dyshime për marrëdhënien armiqësore (që deklarohet publikisht) të Kryemadhit dhe Veliajt.
Në dokumentin e pronësisë së një trualli në rrugën Mjull-Bathore, në Bashkinë Tiranë, pronarët janë: Fatime Kryemadhi (nëna e Monika Kryemadhit) me 12.2%, Monika Kryemadhi me 17% dhe shoqëria “AGI KONS” me 70.8%.
“AGI KONS” është në pronësi të Gentjan Sulës, i konsideruar si oligark qeveritar, përfitues i parave publike me vlerë qindra milionë euro. Shumicën e tenderave që i ka përfituar me procedura të dyshimta sipas vlerësimit nga “Open Procurment”, janë nga Bashkia Tiranë.
“AGI KONS” në bashkëpunim me një subjekt tjetër, kanë përfituar nga Bashkia Tiranë e drejtuar nga Veliaj edhe tenderin për “ndërtimin e Teatrit të ri Kombëtar, faza 1”, me vlerë 18.5 miliardë lekë.
Çuditërisht, bashkëpronarja e tij në pasuri të paluajtshme, Monika Kryemadhi, ishte një nga protestueset e zëshme kundër prishjes së Teatrit dhe që u përplas me policinë ditën e shembjes së godinës.
Tenderit i sipërpërmendur është markuar me “flamur të kuq” nga “Open Procurment” për s’kualifikimin e të gjithë operatorëve konkurrues përveç fituesit, ç’ka ngre dyshime për fitues të paracaktuar.
Ndër prokurimet e fituara nga Bashkia Tiranë të kësaj firme, është edhe ajo për rehabilitimin e “Parkut Rinia” me më shumë se 1 miliard lekë. Procedurë e shënjuar gjithashtu me “flamur të kuq”, ç‘ka tregon rrezikun potencial të një afere korruptive mes tenderuesve dhe përfituesit.
Një tjetër kontratë e majme e fituar nga “AGI KONS”, është edhe tenderi për përmirësim furnizimi me ujë te “Kodra e Diellit” – zonën ku jetojnë si Kryemadhi ashtu edhe Veliaj.
Kompania e Gentjan Sulës ka marrë edhe nga Bashkia Këlcyrë e drejtuar Nga Erion Isai një tender prej 3.3 milird lekësh për furnizimin me ujë të disa fshatrave. Një procedurë që bëri zhurmë në media, ndërsa u ngritën dyshime se për favorizimin e Gentjan Sulës, Isai mori në këmbim sipërfaqe ndërtimi te Kodra e Diellit, ku ka ndërtuar “AGI KONS” shpk.
Teksa dokumentet flasin për një marrëdhënie të dyshimtë Veliaj-Kryemadhi, pyetja që shtohet (në kuadër të një opozitbërje të moralshme) është: A janë në dijeni të këtyre fakteve demokratët që ishin në Konventën e LSI-së pak ditë më parë?
Discussion about this post