Deputetja e Partisë së Lirisë, Monika Kryemadhi thotë se nëse për Ramën nuk reagojnë institucionet, atëherë do të jetë revolucion popullor që do ta largojë atë.
Në një intervistë për News24, Kryemadhi u shpreh se nëse arrihet tek revolucioni popullor, atëherë nuk ka politikan që t’i bëjë ballë.
Kryemadhi tha gjithashtu se protestat nuk do ti pëleqnin në ditë pushimi, por në ditë javë, atëherë kur edhe Rama firmos për abuzimet.
Deklarata
“Revolucioni është një aksion, por në këndvështrime të ndryshme. Nga ana biologjike është evolucion, që do të thotë zhvillim. Ne shohim që vazhdojnë dhe vidhen para nga inceneratorët. Kur nuk funksionon sistemi i drejtësisë, shoqëria duhet të ngrihet dhe të bërë revolucion. Revolucioni paqësor vjen me narrativë, ka edhe revolucion popullor. Ky është kur populli ngrihet dhe rrëzon qeverinë. Kur vjen revolucioni popullor nuk ka njeri që ta ndalojë dhe nuk ka politikan që ti bëjë ballë.
Personalisht nuk do më pëlqenin protesta ditë të shtunë dhe të diel. Mendoj se duhet të bëhen në ditë jave. Vërtet në fundjavë njerëzit janë më të lirë, por beteja nuk është te numri. Betejat duhet të bëhen në ditë jave, atëherë kur Rama firmos. Ai firmos ditë jave koncesionet dhe vjedhjet e shqiptarëve, jo në fundjavë. Mos harroni që ka dyfishuar pagesën e patentës. Asgjë nuk ka ndryshuar? Po, çmimi naftës?”, tha Kryemadhi.
Më tej shtoi:
“Rama është një diktator skizofrenik. Në raste të tilla këta janë njerëz që masakrojnë dhe familjarët e tyre për hir të pushtetit. E di që do të jetë e vështirë për ta lëvizur, por metodologjia nuk është problemi Rama po ata që e institucionalizojnë atë. Të paktën aq ndërgjegjeje profesionale e morale te ato institucione që kornizojnë funksionimin e një diktatori skizofrenik, do të japë efektet saj. Në të kundërt, revolucioni popullor do e bëjë. Se kur vjedh 30 mijë euro çdo ditë për inceneratorët dhe fut në burg një 84-vjeçare për një kotec, do të ketë efektin e saj dhe do të çoj njerëzit drejt një përplasje. Siç ndodhi dhe në rastin e IKMT-së. Nuk i hypi ruspës Dallëndyshja…, problemi është që nuk do e mbajë vetëm Dallëndyshja, por kush i del për zot asaj dhe atyre që godasin në emër të tyre. Kush i del për zot asaj? Çështjen e inceneratorit e kam ndërtuar në një strategji ndryshe. Këtu çudia më e madhe tre ditë zgjat dhe pastaj e harrojmë. I kam lënë kohë sistemit të drejtësisë për të reaguar. Kemi raste që institucionet nuk kthejnë përgjigje Kryemadhit dhe presidentit, por gjykatës dhe SPAK-ut po”.
Discussion about this post