Njëmbëdhjetë vepra arti të Pablo Picasso-s janë shitur në ankand për gati 94 milionë euro (110 milionë dollarë) pasi kaluan vite të tëra të ekspozuara në një hotel në Las Vegas.
Ankandi i Sotheby’s u zhvillua në hotelin dhe kazinonë Bellagio në pronësi të “MGM Resorts”, ku pjesët u shfaqën në restorantin e tij “Picasso”.
“Ylli” i mbrëmjes ishte piktura “Woman in a Red-Orange Beret”, e cila shfaq të dashurën dhe muzën e Picassos, Marie-Thérèse Walter. Ajo u shit për 40.5 milionë dollarë. Piktura tjetër “Homme et Enfant” arriti shifrat 24.4 milionë dollarë.
Tabloja “Nature morte au panier de fruits et aux fleurs”, e cila u pikturua nga artisti gjatë pushtimit nazist të Parisit arriti shifrat 16.6 milionë dollarë.
Ky koleksion u nis rreth 20 vite më parë nga miliarderi amerikan Steve Wynn, i cili kishte më herët në pronësi dhe hotelin Bellagio.
