Presidenti amerikan Donald Trump ka dërguar një mesazh të fortë ndaj Hamasit, duke e paralajmëruar se nëse nuk liron dhjetëra pengje izraelite, çmimi që do paguajnë, do jetë shumë i madh.
Në një postim të mërkurën, ai i kujton Hamasit dhe udhëheqjes së tij se u sigurua që ta pajiste Izraelin me gjithçka që i duhej për ta eliminuar plotësisht Hamasin.
““Shalom Hamas” do të thotë “Përshëndetje dhe Mirupafshim”
Ju mund të zgjidhni. Lironi të gjithë pengjet tani, jo më vonë, dhe ktheni menjëherë të gjithë trupat e njerëzve që keni vrarë, përndryshe mbaron për ju. Vetëm të sëmurët dhe të çoroditurit mbajnë kufoma, kurse ju jeni të sëmurë dhe të çoroditur!
Unë po i dërgoj Izraelit çdo gjë që i nevojitet për të përfunduar punën, asnjë anëtar i Hamasit nuk do të jetë i sigurt nëse nuk bëni atë që ju them. Sapo u takova me ish-pengët tuaj, të cilëve ju shkatërroni jetën.
Ky është paralajmërimi juaj i fundit! Për lidershipin, tani është koha për t’u larguar nga Gaza, ndërsa ju keni ende shansin. Gjithashtu, për banorët e Gazës: Ju pret një e ardhme e bukur, por jo nëse mbani pengje. Nëse e bën, je i vdekur! Merrni një vendim të zgjuar. LIRONI PENGET TANI, PER Ndryshe DO TE PAGUHENI SHUM SHUM SHUM ME VON!”, thuhet në mesazhin e Trump.
Hamasi reagoi kundër kërcënimit të fundit të presidentit amerikan Donald Trump për lirimin e pengjeve izraelite, duke deklaruar se ato do të lirohen vetëm në këmbim të një armëpushimi të qëndrueshëm në Rripin e Gazës.
Hamasi akuzoi Trump dhe kryeministrin izraelit Benjamin Netanyahu se po përpiqeshin të tërhiqeshin nga marrëveshjen e armëpushimit të arritur në muajin janar, e cila kërkonte një fazë të dytë të negociatave për të liruar pengjet izraelite dhe të burgosurit palestinezë, për një armëpushim të përhershëm dhe tërheqjen izraelite nga Gaza.
Zëdhënësi i Hamasit, Abdel-Latif al-Qanoua, theksoi se “rruga më e mirë për lirimin e pengjeve izraelite ishte përmes negociatave, të cilat pritej të fillonin në shkurt”.
Më 19 janar u arrit marrëveshja për armëpushim në Gazë dhe për lirimin e pengjeve të marra nga grupi palestinez Hamas gjatë sulmit të 7 tetorit 2023, rreth 250 gjithsej. Më shumë se 100 u liruan gjatë armëpushimit javor në fund të vitit 2023.
Marrëveshja e ndërmjetësuar nga Egjipti, Katari dhe Shtetet e Bashkuara parashikon tri faza.
Izraeli thotë se në Gazë kanë mbetur edhe 59 pengje, nga të cilat 24 besohet se janë gjallë, ndërsa trupat e 35 të tjerëve ruhen nga Hamasi. Në muajin shkurt, gjatë fazës së parë të armëpushimit, Hamasi liroi 25 pengje dhe trupat e 8 pengjeve pa jetë në këmbim të 1.900 të burgosurve palestinezë në Izrael.
Discussion about this post