Ktheu shtëpinë në laborator droge, arrestohet 23-vjeçari në Tiranë

Në Tiranë është zbuluar një banesë e përshtatur për përgatitjen e dozave të kanabisit.

Pas kontrolleve, autoritetet sekuestruan 5 kilogramë lëndë narkotike kanabis dhe 2 peshore elektronike.

Për rastin ka përfunduar në pranga një 23-vjeçar dhe një klient i tij nga Turqia, ndërsa është shpallur në kërkim bashkëpunëtori i tij.

Po ashtu, është arrestuar edhe një shtetas turk, të cilit iu gjet një sasi lënde narkotike kanabis që dyshohet se ia kishte blerë 23-vjeçarit.

“Në kuadër të këtij operacioni, u arrestua në flagrancë shtetasi S. H., 23 vjeç, banues në Tiranë dhe u shpall në kërkim shtetasi Xh. B. Nga veprimet hetimore dyshohet se këta bashkëpunonin për sigurimin e lëndës narkotike, ndarjen e saj në doza dhe shitjen e tyre në qytetin e Tiranës.

Gjatë kontrollit në banesën e marrë me qira nga shtetasi Xh. B., shërbimet e Policisë kanë gjetur 5 kg lëndë të dyshuar narkotike kanabis dhe 2 peshore elektronike, që u sekuestruan në cilësinë e provës materiale”, njofton policia.

Materialet procedurale i kaluan Prokurorisë, për veprime të mëtejshme.