Kthyen burgjet në loto, Dënohet “Gaxhai”, Llanaj dhe gardianët -

Disa prej emrave të njohur të botës së krimit në Shqipëri, të cilët janë duke vuajtur dënimin në burgun e Peqinit, Bradasheshit dhe Drenovës në Korçë, janë shpallur fajtorë dhe dënuar nga gjykata e Elbasanit.

Emra të njohur si Gazmir Braka ose “Gaxhai” i Vlorës dhe Aleksandër Llanaj, të dënuar me burgim të përjetshëm për krime në vitin 1997 dhe masakrën e “Qoles”, kanë marë një dënim tjetër.

Ka qenë gjyqtarja e Elbasanit, Matilda Fetau, e cila në datën 10 shkurt 2023, ka vendosur të pranojë kërkesën e prokurorisë duke shpallur fajtor dhe dënuar, me 1 vit e 7 muaj burg Gazmend Brakën dhe me 3 vjet e 4 muaj burgim, Aleksandër Llanaj.

“Gaxhai” vuan dënimin me burg të përjetshëm në Drenovë të Korçës, ndërsa dënimi i tanishëm bashkohet me vendimin e përjetshëm që ai po vuan.

Gazmir Braka, rezulton se kishte futur në qeli një aparat telefonike dhe mbante kontakte me njerëzit jashtë burgut dhe vetë gardianët, siç është njëri prej tyre i përgjuar nga prokuroria, Olgert Muçka.

Aleksandër Llanaj, është një tjetër i dënuar që përveç se kishte futur një aparat telefoni në ambjentet e burgut të Drenovës, ai kishte krijuar brenda në burg një zinxhir komunikimesh për vendosjen e basteve sportive nga brenda ambienteve të burgut.

Mes personave të tjerë që dënoi gjykata me 1 vit e 7 muaj burgim, është Aleksandër Sinanaj, personazh i cili prej vitit 2018 është arrestuar nga policia për grabitjen e një banke të nivelit të dytë në Vlorë.

Një tjetër personazh që vuan dënimin me burgim të përjetshëm për vrasjen e tre shtetasve në 28 korrik 2013 në Vlorë, Sokol Isufaj, Serdi Bajlozi dhe Diana Ademi, rezulton të jetë Delin Hajdari. Edhe ky i fundit sipas vendimit të gjykatës, kishte arritur të fuste një aparat telefoni në ambientet e qelisë së tij, dhe për këtë fakt është dënuar sërish me 1 vit e 7 muaj burgim.

Po me të njëjtën masë dënimi 1.7 vite burgim, është shpallur fajtor për akuzën e “Organizim të lotarive të palejuara” dhe “Futjen e Telefonave në burg” Aleksandër Alibashi. Edhe ky i fundit, vuan dënimin me burg përjetë në Drenovë për një krim të kryer disa vite më parë në Vlorë.

Ndërkohë mes të dënuarve janë dhe disa punonjës të burgut të Bradasheshit dhe Drenovës. I vetme i pandehur që nuk ka pranuar akuzën e ngritur nga prokuroria është Arben Grori, i cili ndryshe nga të akuzuarit e tjerë që pranuan të gjykohem me gjyq të shkurtuar, ai ka zgjedhur ti nënshtrohet gjykimit të zakonshëm.

Sipas dosjes së prokurorisë, rezulton se gardiani Robert Dedaj komunikonte me të burgosurin Arben Grori, ku e njoftonte mbi kontrollin e dhomave, duke i dhënë mundësi të fshihte sendet e paligjshme që mbante.

Po ashtu në dosje thuhet se në qelitë e Aleksandër Llanaj, Delin Hajdarit dhe Leo Osmanit në burgun e Drenovës, Korçë nuk ushtroheshin kontrolle periodike, duke lejuar në qelit ë e tyre mbajtjen e alkool apo telefonave celularë me të cilat kryheshin komunikime me të dënuar në burgjet e tjera apo dhe me persona jashtë burgut.

Deri në 2 dhjetor 2020 Llanaj kishte përdorur tre numra me të cilët komunikonte me Arben Grorin, i dënuar në burgun e Peqinit, të dashurën e tij dhe me një person me të cilin vinte baste vetë apo dhe në emër të shokëve.

Ishte pikërisht komunikimi me të dashurën që ‘zbuloi’ Llanajn, pasi pas përgjimit të telefonit ët saj, policia zbuloi numrat e telefonit që përdorte i dënuari.

Qelia nuk e pengonte Llanajn as që të vendoste baste, gjë që e bënte jo vetëm për vete, por edhe për të dënuar të tjerë, përmes telefonit.

Personi që i lidhte ishte me pseudonimin Sanço, i cili kishte në përdorim një lokal në Vlorë ku organizoheshin lojëra fati e bixhozi dhe gjithashtu edhe loto sporti.

Më paraburgimin e Elbasanit, të burgosurit siguronin edhe alkool, ku një shishe u kushtonte 50 euro, ndërsa për 200 euro gardiantët mund t’i ndërronin qelinë për t’i çuar në një më të mirë.