Pas ndeshjes me Luzin, të cilën skuadra e Kukësit e fitoi me rezultatin 1-0 me golin e Mario Beshirajt, tekniku i verilindorëve, Rraman Hallaçi pohon se po provon të gjithë lojtarët, por pjesa e parë, ndaj ekipit të Luzit, kishte disa vështirësi.
“Testin e radhës e patëm me Luzin, një kundërshtar serioz. Sigurisht në vazhdojmë me aktivizimin e të gjithë lojtarëve, ku në çdo ndeshje po marrim pjesë 22 futbollistë. Sa i përket ndeshjes, pjesa e parë ishte pak e vakët, pasi nuk patëm shumë lëvizshmëri dhe topin nuk e luajtëm shpejt, edhe pse u afruam disa herë te porta e kundërshtarit. Normalisht lojtarët janë pak të ngarkuar, duke ditur që jemi gjatë fazës përgatitore”, u shpreh fillimisht Hallaçi.
Më tej, gjatë intervistës për median shqiptare “Panorama Sport”, ai vlerëson mesfushorin Abdou Mbarak, i cili është edhe një nga lojtarët më me eksperiencë te blutë këtë sezon.
“Një lojtar në mesfushë si Abdou të jep shumë garanci në mbajtjen e topit, sidomos kur e ka kundërshtarin afër dhe ia del si gjithmonë edhe në situata të vështira. Është një lojtar kyç për ekipin”, vijoi më tej trajneri i Kukësit, që nuk i kursen elozhet për mesfushorin nga Mauritania.
VËSHTIRËSITË
Më pas, Hallaçi pohon se skuadra pati një tjetër nivel në pjesën e dytë, edhe pse e pranon se vuajnë pak para portës. Ai u “tërheq” veshin sulmuesve, ku kërkon më shumë efikasitet në mundësitë që krijohen.
“Në pjesën e dytë skuadra u shpreh më mirë dhe ishim më të qartë. Bëmë lojën që donim, daljet në krah ishin mjaft të mira, por para porte vuajmë pak. Skuadra shkon rrjedhshëm deri në zonën e rreptësisë dhe kjo do të thotë që pres shumë nga sulmuesit.
Duhet të jenë më efikasë në momentet kur skuadra punon për ta dërguar topin te zona e duhur. Po punojmë çdo ditë dhe po mundohemi të bindim lojtarët për stilin e lojës që kemi. Skuadra po rritet dhe kjo duket qartë në çdo stërvitje dhe ndeshje”, mbylli prononcimin e tij për gazetën tekniku i bluve.
Kukësi shpreson që të jetë gati për më 19 gusht, kur do të udhëtojë në transfertën shkodrane me ekipin e Vllaznisë. Kundërshtar që janë ndeshur dy herë në start dhe kanë një bilanc pozitiv, ku kanë koleksionuar një fitore dhe një barazim. Në Kukës shpresojnë që ta ruajnë këtë trend pozitiv edhe këtë sezon./PanoramaSport
Discussion about this post