Policia e Vlorës ka vënë në pranga një person, ndërsa ka shpallur në kërkim një tjetër, pasi kultivonin lëndë narkotike.
Sipas njoftimit, mësohet se është arrestuar E. I. 35 vjeç, banues në fshatin Mërtiraj, Selenicë, ndërsa është shpallur në kërkim L. I., 30 vjeç, banues po në Selenicë pasi në bashkëpunim me njëri-tjetrin, gjatë muajit shtator dhe tetor, kanë kultivuar bimë narkotike të dyshuara cannabis sativa, në vende të ndryshme të territorit të fshatit Mërtiraj, bashkia Selenicë, Vlorë.
Në vijim të kontrolleve në banesat e tyre, konkretisht në banesën e L. I., shërbimet e Policisë gjetën dhe sekuestruan në cilësinë e provës materiale 1.1 kg lëndë e dyshuar narkotike kanabis (në trajtë bimore), si dhe 1 armë zjarri automatik.
Materialet i kaluan Prokurorisë pranë Gjykatës së Shkallës së Parë Vlorë, për veprime të mëtejshme.
