Komuniteti shqiptar në Britaninë e Madhe ka zgjedhur të mos rrijë më në heshtje pas sulmeve dhe etiketimeve të bërë nga politika e mediat atje. Emigrantët shqiptarë, të cilët punojnë dhe jetojnë në Angli do të protestojnë më 12 nëntor në Westminster Bridge.
“Protestë kundër poshtërimit të shqiptarëve në Britani”, kjo është motoja e protestës së shqiptarëve, të cilët do të shprehin pakënaqësitë e tyre në Londër.
Çështja e emigrantëve shqiptarë ka nxehur tonet e politikës angleze dhe asaj shqiptare. Ka qenë kryeministri Edi Rama, i cili ka dënuar publikisht gjuhën e përdorur të politikanes britanike Suella Braverman kundër emigrantëve shqiptarë.
Lexo edhe: Dyndja e shqiptarëve në Angli/ Mediat britanike: Ministrat plane për t’i kthyer në atdhe
Shefi i qeverisë u bëri thirrje autoriteteve britanike të mos diskriminojnë shqiptarët pasi sipas Ramës, ky komunitet është integruar plotësisht dhe kontribuon në ekonominë angleze duke paguar taksa.
Ai theksoi se politika angleze ka dështuar në menaxhimin e emigracionit dhe kjo për Ramën nuk e legjitimon gjuhën tendencioze, sulmuese dhe diskriminuese në adresë të shqiptarëve.
Mediat angleze prej ditësh mbajnë në faqet e para çështjen e emigrantëve shqiptarë, ku thonë se rritja e numrit të të rinjve që mbërrijnë në Angli lidhet drejtpërdrejt me gjendjen e vështirë ku ndodhet Shqipëria për shkak të keqqeverisjes dhe nivelit të lartë të korrupsionit.
Discussion about this post