Kupa e Italisë, Italiano: Pres një paraqitje si ajo në Bazel, Interin e vëmë në vështirësi -

Në Romë gjithçka është gati për finalen e Kupës së Italisë. Në letër, Fiorentina luan rolin e humbësit ndaj Interit, por Vincenzo Italiano premton betejë. “Është krenari të jesh këtu për të luajtur në finale – shpjegoi trajneri – Ne duhet të ripropozojmë atë që na lejoi të arrijmë këtu, duke menduar vetëm për veten tonë, duke bërë gjithçka që është e mundur për ta vënë Interin në vështirësi”. “Ne kemi nevojë për një paraqitje superlative si në Bazel, dua të shoh përsëri të njëjtën performancë si në atë ndeshje – shtoi ai – Ne do të luajmë shanset tona. Kemi arritur deri këtu dhe do të përpiqemi t’i vëmë në vështirësi kundështarët tanë”.

Inter, pengesë e madhe

“Ne jemi shumë krenarë që kemi ardhur këtu sonte, të jemi nesër në fushë si dhe fakti që kemi takuar Presidentin e Republikës sot. Ka qenë një rrugëtim fantastik. Dhe nuk do të harrojmë finalen tjetër. Ne po përgatitemi të përballemi me finalistin në Champions League.

Na pret një pengesë shumë e vështirë, por jemi të qetë. Ne do të luajmë shanset tona. Kemi arritur deri këtu dhe do të përpiqemi t’i hapim “Nerazzurrëve” shumë punë. I vetmi frymëzim që marr nga ndeshjet e ligës kundër Interit është se ne kemi treguar se kemi armët për të “nervozuar” atë ekip.

Megjithatë, me një ndeshje të vetme, mendoj se do të jetë një histori tjetër. Ne i dimë karakteristikat e tyre dhe ata i dinë tonat, por menaxhimi dhe ecuria e ndeshjes do të jetë e ndryshme nga ndeshjet e ligës. Futbolli është plot me surpriza”.

Emocionet për finalen

“Dua të fokusohem në dy vitet e fundit. Gjithçka filloi në Moena dhe ka pasur një proces të jashtëzakonshëm rritjeje falë vullnetit të djemve. Ata kanë qenë të fokusuar dhe të gatshëm të dëgjojnë idetë e mia për të dalë nga momente më pak emocionuese.

Së bashku kemi arritur këtë kualifikim për në Evropë dhe kemi arritur në gjysmëfinale të Kupës së Italisë. E nisëm këtë sezon me synimin për t’i përmirësuar këto dy rezultate dhe ia dolëm. Kam punuar me të gjitha forcat, pasionin tim dhe dëshirën time, duke u përpjekur të ndaj gjithçka me djemtë.

Megjithatë, nuk duhet të kënaqemi me arritjen në finale. Do të luajmë në dy finalet me besim në veten tonë. Duke filluar nga nesër, duke u përpjekur të japim gjithçka për të arritur diçka të jashtëzakonshme”.

Plani për finalen

“Dikush e imagjinon ndeshjen, por më pas çdo gjë mund të ndodhë në çdo ndeshje dhe strategjitë apo planet duhet të ndryshohen.

Kështu që unë preferoj të fokusohem te djemtë e mi dhe lojën tonë. Ne duhet të përsërisim atë që na ka sjellë këtu. Me cilësi. Ne duhet të bëjmë çdo gjë për të vënë në vështirësi Interin.

Duhet te luajmë një ndeshje te madhe superlative si ndaj Bazelit. Duhet te kalojmë përtej pengesave. Kundërshtari i nesërm do te jete një mal shumë i vështirë për t’u ngjitur. Dua të shoh të njëjtën përformancë si në Zvicër”.

Finalja mes “specialistëve”

“Përveç cilësisë së madhe të lojtarëve të Interit dhe kampionëve që ata kanë në fushë, ka edhe një trajner që di të shkojë shpesh në finale dhe që di gjithashtu t’i fitojë ato. Inzaghi është një specialist, nuk e fshehim dot.

Në finalet që kam luajtur deri tani kam kuptuar që nuk duhet të braktisësh kurrë besimin tënd. Çfarëdo që të ndodhë, do të duhet të përveshim mëngët dhe të përballemi me tre ndeshje të tjera shumë të rëndësishme, dy në kampionat dhe një në Conference League.

Nesër është një tjetër provë e shkëlqyer dhe një mundësi për të treguar cilësinë tonë dhe për të treguar se e meritojmë të luajmë këtë ndeshje”.

Shtytja e tifozëve

“Gjashtëmijë tifozët e djeshëm na dhanë optimizëm dhe pasion. Ata na kërkojnë të japim shpirtin, të djersijmë dhe të nderojmë këtë fanellë dhe historinë e klubit.

Mendoj se djemtë e kanë perceptuar dashurinë e tifozëve. Nesër me siguri ne do të shkojmë në fushë për të nderuar atë që kemi bërë gjatë gjithë vitit”.

Dyshime në stërvitje

“Unë kam gjithmonë dyshime se si ta vë kundërshtarin në vështirësi. E lëre më kundër një ekipi të fortë si Interi. Të gjithë djemtë janë mirë. Ata e dëshmuan këtë në Bazel dhe në Torino.

Kam disa dyshime për ndonjë lojtar, por shpresoj se do të bëj zgjedhjet e duhura dhe kushdo që hyn do të japë gjithçka. Unë do të vendos nesër”.

Kushtet fizike të Amrabat dhe Gonzalez

“Ata janë mirë. Amrabatin e menaxhuam mirë, ne preferuam ta mbanim Nicon të qetë, sepse ai kishte dhënë shumë në Bazel. Ata të dy po punojnë shkëlqyeshëm.”

Jovic apo Cabral në sulm?

“Dëshiroj të nënvizoj faktin se të dy janë bërë të rëndësishëm për këtë ekip. Kemi arritur fitore, rezultate dhe vazhdimësi. Gjithashtu falë paraqitjes së tyre ne jemi këtu për të luajtur në këtë finale. Jovic dhe Cabral kanë treguar se mund të luajnë në finale. Të dy e dinë rëndësinë e ndeshjes. Fillimi nga minuta e parë apo gjatë ndeshjes nuk ndryshon asgjë. Pres sakrificë, ftohtësi dhe cinizëm. Jam i bindur që jemi në duar të mira”.