Kupa e Shqipërisë/Teuta dhe Tirana kryejnë detyrën

Kanë përfunduar, ditën e sotme (14 mars) dy nga takimet e kthimit të fazës çerekfinale të Kupës së Shqipërisë.

Tirana, e cila e kishte hipotekuar “de facto” kualifikimin për në raundin tjetër që në takimin e parë falë fitores 4-1, administroi avantazhin ndaj Kastriotit.

Në “Selman Stërmasi”, sfida mes këtyre dy skuadrave, përfundoi në barazim 2-2. Golat u shënuan nga Hasani dhe Najdoski, për vendasit, ndërsa për ekipin nga Kruja realizuan Iseni dhe Ajazi.

Frikë pati për Teutën. Klubi durrsak, pothuajse, e humbi biletën për në gjysmëfinale, teksa u mposht 2-1 në atë që dikur njihej si “Stadiumi Zeqir Ymeri” nga skuadra e Kukësit.

Verilindorët, pas golit të pësuar nga Gruda, në pjesën e parë, gjetën barazimin me Rashitin në minutën e 49-të.

Pesë minuta nga fundi i takimit, penalltia e realizuar nga Taipi i dha shpresë Kukësit për të barazuar rezultatin e përgjithshëm por Teuta arriti të mbrohej mirë duke kaluar më tej.

Ditën e nesërme pritet të mësohen edhe dy skuadrat e tjera nga takimet, Partizani-Vllaznia dhe Laçi-Egnatia.