Kupa e Shqipërisë na ka dhuruar një befasi ditën e sotme. Ndeshja mes Laçit dhe Egnatias së Rrogozhinës, pritej të ishte deri diku e ekuilibruar, me vendasit pak më favoritë, prej faktorit fushë. Megjithatë futbolli rezervon surpriza (nëse mund të themi kështu).
“Të gjelbërit” kanë arritur të kualifikohen në fazën tjetër të turneut, me autoritet madje, duke fituar plot tre me zero përballë një skuadre si Laçi, që në stadiumin e vet është pothuajse i pathyeshëm.
Që gjërat do shkonin mirë për miqtë, dukej që në fillim të pjesës së parë kur, në minutën e 20-të, Madeiros zhbllokoi rezultatin. Një avantazh shumë i rëndësishëm ky për Egnatian.
Në pjesën e dytë pritej reagimi i “bardhezinjve”, megjithatë, rrogozhinasit nuk e ulën ritmin edhe në të 54-ën minutë dyfishuan me Kasën. Të demoralizuar, tashmë, kurbinasit nuk mundën të reagonin, me Madeiros që kompletoi kryeveprën duke realizuar të tretin në minutën e 66-të.
Në fund të takimit, nuk pati më histori, me Egnatian e Rrogozhinës që siguroi biletën për në fazën gjysmëfinale.
Discussion about this post