Mbrëmje dramatike për futbollin shqiptar në Europë, me Egnatian dhe Dinamon që u eliminuan në mënyrë të dhimbshme pas kohës së rregullt.
Të dyja skuadrat shqiptare ishin vetëm pak minuta larg një tjetër historie europiane, por shtesa u kthye në makth për to.
Egnatia ishte në avantazh ndaj Lillestromit deri në minutën e 82-të, kur norvegjezët barazuan dhe e çuan ndeshjen në shtesë.
Kampionët e Shqipërisë rezistuan, por në minutën e 94-t Olsen shënoi golin që i dha Lillestromit fitoren 2-1.
Kështu, rrogozhinasit humbën mundësinë për të siguruar një vend në fazën e ligës së Europa League.
Megjithatë, aventura europiane e Egnatias do të vazhdojë në Conference League.
Edhe për Dinamon fati ishte i ngjashëm, por drama ishte edhe më e madhe.
“Blutë” luftuan deri në fund ndaj Pafos, duke barazuar rezultatin vetëm pak minuta para përfundimit të 90 minutave.
Me shpresën për t’i mbijetuar presionit dhe për ta çuar ndeshjen te penalltitë, Dinamo u tërhoq në kohën shtesë.
Por pikërisht aty erdhi goditja fatale, me Pafos që shënoi dy gola dhe siguroi kualifikimin.
Në pak orë, dy skuadra shqiptare përjetuan të njëjtin fat: 90 minuta të luftuara dhe një eliminim në shtesë.
Koha shtesë u mohoi Egnatias dhe Dinamos ëndrrën europiane, duke treguar edhe një herë sa e pamëshirshme mund të jetë kjo pjesë e ndeshjes.
Megjithatë, të dyja skuadrat mund të largohen me kokën lart, pasi luftuan deri në sekondat e fundit përballë kundërshtarëve të fortë.
Një natë me shumë pengje për futbollin shqiptar, ku shtesa rezultoi sërish armiku më i madh i skuadrave kuqezi.
Discussion about this post