Prej mbrëmjes së djeshme, kur me plumbin në kokë në rrezik për jetën Aldi Rama u transferua në spitalin e Traumës, asnjë prej familjarëve apo miqve të tij nuk pyeti e as nuk u paraqit për të mësuar mbi gjendjen e tij. Por sot babai i viktimës mes lotësh ka treguar kalvarin e peripecive që djali i tij ka kaluar që në fëmijëri. Ai ka treguar se Aldi jetonte me pensionin e gjyshit dhe se së fundmi ishte shkëputur nga çdo familjar. Për të siguruar jetesën e tij, ka ndihmuar edhe vëllai i cili jetonte në Greqi.
“Kohët e fundit u shkëput nga çdo familjar. Aldi jetonte me pensionin e gjyshit. Nuk i kërkoja kurrë lekë fëmijëve, më duket se i keqtrajtoj. I mësoja si ta mbajë lekun. I ka dërguar vëllai sa ka pasur mundësi, e ka dashur shumë. Vëllai është në gjendje shumë të keqe sot. Jeton në Greqi. Kishte mbi 10 ditë që nuk komunikonte me të. Ka mundësi të nisem nesër në mëngjes nga ora 8:00, por nuk e kemi vendosur. Kur më ka rënë brenda për herë të parë, thashë shyqyr zotit që nuk u bë gjë më e madhe se ishte fëmijë dhe bëra të pamundurën që të dalë djali”, ka treguar ai.
Ai “shfajëson” veprimtaritë kriminale të të birit, duke pretenduar se ai është thjeshtë një fëmijë që u arrestua për dy tre doza hashashi dhe se sipas tij, shkak ka qenë papunësia.
“Ndërsa për Aldin kur dëgjova se ka rënë për herë të dytë brenda për 5 cigare hashash, ishin fëmijë, jo grup kriminal. Ka shumë të rinj që e bëjnë këtë nga papunësia. Pse nuk përfundon në krim një bos? Po na vrasin rininë, po vrasin fëmijën tanë. Fajin e ka shteti. Nuk mundet të mbyllet një fëmijë në shtëpi pa bukë”, ka treguar ai.
I tronditur për humbjen e djalit të tij, babai i viktimës ka shtuar se ka qenë fëmijë shumë i mirë dhe se vuante nga padrejtësia.
“Nuk kam asgjë çfarë të them, jam gjysmë njeriu, nuk ngrihem dot në këmbë. Nuk di çfarë të them. Drejtësi deshëm, duhet të shiheshin këto gjëra të djalit tim. Unë falënderoj RENEA-n që ka vepruar me gjakftohtësi sepse djali vrau një efektiv. I falënderoj shumë se si u sollën. Gjyshërit e dinë që është në burg, nuk e dinë që nuk jeton më. Aldi ka qenë fëmijë shumë i mirë, vuante nga padrejtësia”, ka treguar babai i të riut.
Ndër të tjera ai ka theksuar se gjyshërit e 21-vjecarit nuk janë ende në dijeni për ngjarjen e rëndë dhe se e ka të pamundur t’ua tregojë të vërtetën e hidhur. Ndërsa ka pretenduar se shkak i kësaj ngjarjeje dhe sjelljeje të Aldit ka qenë varfëria.
“Nuk mund të flas me gjyshërit, nuk mund t’i dal para syve, do më mbysin, do më vrasin për Aldin. Nuk kanë televizor, të shkojnë këta gazetarët të shohin ku jetojnë. Jetonte në një dhomë me prindërit e mi. Nëna ime 90 vjeçe gatuante një pjatë gjellë për Aldin. Po u tregova gjyshërve, mbaruan të dy… Ata e rritën Aldin, ka qenë i dashur, nuk ka qenë kriminel. Ne jemi nga një familje e varfër, jo terroriste. Fëmija ka qenë i dashur, i vetmuar, pa prindërit afër, ka qenë me shoqëri shumë të keqe. Mamaja e Aldit është interesuar por çfarë do të bëjë…”, ka deklaruar ai.
Prindërit e 21-vjeçarit ishin të divorcuar, teksa babai i tij mësohet se ndodhet në një burg në Greqi, i dënuar për vrasjen e një personi, të cilin e kishte prerë me sharrë. Nëna e tij ka qenë në Greqi dhe atje ka pasur një martesë me një shtetas grek dhe më pas ishte kthyer në Durrës ku ka krijuar një tjetër lidhje.
