Shqipëria, një vend i vogël, por me pozicion gjeopolitik kritik në Ballkan dhe në krah të NATO-s, është sot viktimë e një skeme të frikshme të kapjes së shtetit që ka prekur deri në thelbin më të ndjeshëm të tij – Shërbimin Informativ të Shtetit (SHISH).
Në krye të kësaj historie që shkon përtej çdo imagjinate qëndrojnë emra të mëdhenj me pasuri të mëdha dhe agjenda të fshehta: Shefqet (Çet) Kastrati, i lidhur ngushtësisht me qeverinë e Edi Ramës, dhe Shkëlqim Devolli, manjat nga Kosova që prej vitesh ka shtrirë rrënjë të fuqishme në Shqipëri – jo vetëm në tregti, por edhe në media.
Devolli është blerësi zyrtar i ABC News Albania, ndërsa Kastrati – sipas burimeve të besueshme – është ai që financon rrogat dhe operacionet ditore të stafit, duke u siguruar që editorialet, lajmet dhe emisionet të mbajnë një linjë të qartë: lavdërim për qeverinë dhe heshtje për korrupsionin. Kjo aleancë e propagandës së kontrolluar është bërë arma më e fuqishme e Ramës kundër opinionit të lirë dhe kundër çdo zëri kritik. Por, jo vetëm. Ata e kanë shtrirë bashkëpunimin e frikshëm në shumë fusha të tjera.
Por pika më e errët në këtë rrjet vjen me emërimi i Vlora Hysenit, ish-shefe e Shërbimit Sekret të Kosovës gjatë presidencës së Hashim Thaçit – një emër i përjashtuar më pas nga Albin Kurti dhe Vjosa Osmani për survejime të paligjshme ndaj kundërshtarëve politikë dhe kontakte të dyshimta me shërbime jo-mike ndaj NATO-s.
Ajo erdhi në Tiranë disa vite më parë si ‘dhuratë’ e Çet Kastratit dhe Devollit për Ramën, dhe menjëherë nisi të rindërtojë SHISH-in sipas interesave të klientelës që e solli. Skandali merr përmasa alarmante me emërimin e Andi Haxhiut, djalit të Baton Haxhiut, i dyshuar për lidhje të thella me shërbimet sekrete serbe (UDB/BIA), si “koordinator i informacioneve sekrete të sigurisë”.
Sipas burimeve sekrete, Andi paguhet me 6,000 euro në muaj nga fondi sekret i SHISH-it, ka akses direkt në informacione të klasifikuara të NATO-s, dhe është pjesë e një liste “ekspertësh” që miratohet vetëm nga drejtori i SHISH dhe kryeministri.
Nëse kjo pagesë është favor politik, është korrupsion. Nëse është detyrë reale, është rrezik kombëtar.
Le të kujtojmë: Andi Haxhiu është akuzuar publikisht për lidhje me Ministrinë ruse të Mbrojtjes në vitin 2017, në kohën kur drejtohej nga Sergey Shoigu, sot njeriu më i afërt i Vladimir Putinit në Këshillin e Sigurisë së Rusisë. Dhe ky individ, bir i një “analisti politik” të paguar sipas shumë burimeve nga shërbimet sekrete të rajonit, kontrollon sot informacionin që SHISH ndan me NATO-n dhe ambasadat.
Ky nuk është më vetëm një skandal. Kjo është një tradhti e ftohtë e brendshme, e orkestruar nga një dorë e padukshme që kontrollon qeverinë, mediat, biznesin dhe tani, edhe shërbimet sekrete.
Nëse SPAK nuk vepron, nëse institucionet nuk ndërhyjnë, atëherë siguria e vendit është zyrtarisht në shitje. Dhe nënshkrimi mbi këtë shitje mban emrat: Shefqet Kastrati, Shkëlqim Devolli, Baton Haxhiu dhe Edi Rama.
Shqipëria meriton më shumë se kaq. Por që të dalë nga kjo zymtësi, qytetarët duhet të kuptojnë: shteti është kapur, dhe kapësit nuk fshihen më – janë në krye të tavolinës.
Discussion about this post