Kurbanet e klikimeve

Nga Elona Caslli

Është kthyer në modë në mediat shqiptare që një situatë private të një njeriu, ta kthejnë në një rrëfim publik. Ngjarja e ndodhur në fshatrat e Librazhdit ku një nuse e re tradhëtoi të shoqin në emigracion, u shndërrua në një rrëfim publik fillimisht nga familjarët e burrit e mandej nga media e kurbanit që është gati të fusë në thertore këdo për një klikim më shumë.
Një ngjarje të një interesi privat, media e shndërron artificialisht në interes publik.
Asokohe nuk jam shprehur për ngjarjen në fjalë se nuk kam qenë në Shqipëri, por po e përmend sot pasi një ngjarje e dytë ka vazhduar zinxhirin e thertores.
Në një nga klubet e natës në Tiranë xhirohet një video ku një vajzë e futur mes dy djemsh kërcen. Të dy djemtë e përkëdhelin njëkohësisht. Në video duket qartë që vajza është e shpenguar dhe duket dora në distancë që e xhiron. Kjo video hidhet në Tik Tok dhe dyert e thertores së mediave hapen. Shfaqet video dhe shpërthen llava e shenjtorëve në Shqipëri që sigurisht gjuan me gurë veç vajzën dhe shumë rrallë djemtë apo dorën që e ka xhiruar atë video.
Lind pyetja- Para se të kurbanizohet kjo vajzë, a ia bën kush pyetjen vetes se në ç’gjendje mund të ketë qenë?! Mund të ketë qenë e dehur dhe aspak e kthjellët gjatë performancës?! Në video nuk ka asnjë çast që ajo ia kthen sytë videos dhe video është e xhiruar në distancë, çka nënkupton se ajo mund të mos e ketë ditur që dikush po xhironte. Apo është i gjatë ky arsyetim?! I biem më shkurt; i fusim një ” e përdalë” mbi kokë dhe e mbyllim hesapin.
Dora që e ka xhiruar atë video dhe dora që e ka shfaqur në Tik Tok është as më pak e as më shumë se kategoria e një spiuni me një çimkë në duar.
Mediat që e kanë publikuar këtë video, ç’mesazh kanë dashur të përcjellin?! Djem merrni nga një celular në dorë dhe filmoni personazhet më pikantë që ju zë syri në klubet e natës dhe na i sillni t’i publikojmë?!
Një pyetje kisha për mediat; Pse nuk ju bën kaq përshtypje kur pasditeve kërcehet ” You can leave your hat home” te ” Përputhen” dhe vihet pulla e kuqe në orën gjashtë të pasdites kur të gjithë fëmijët janë zgjuar?!
Pse nuk ju bën kaq përshtypje te ” Love Story” ku vajzat presin grafikun për t’u takuar me të njëjtin djalë dhe zhvishen nga dinjiteti i tyre?!
Kur situata e klubit të natës shfaqet në ekrane televizive është histori dashurie. Kur e njëjta situatë shfaqet në një klub nate është e denjë për kurban. Sikur na dalin llogaritë.
Dhe e fundit jo për nga rëndësia, por për nga renditja; Kush merr përsipër përgjegjësinë e dëmit psikologjik që mund t’i shkaktohet një vajze apo një gruaje nga i gjithë ky proces?!
Apo e mbyllim me formulën – Vetë deshi- dhe presim kurbanin e radhës?!
Një situatë private nuk mund të kthehet në rrëfim publik, për sa kohë nuk prek taksat dhe interesat e drejtpërdrejta të shqiptarëve.
Post Scriptum- Reflektoni pronarë portalesh dhe mjaft e shndërruat privaten në publike!
Elona Caslli