Kryeministri Albin Kurti ka bërë me dije se Plani i BE-së për normalizim të marrëdhënieve me Serbinë duhet të përmbajë detaje konkrete dhe të jetë gjithëpërfshirës.
Gjatë takimit në Strasburg me Kryetarin e Komisionit për Punë të Jashtme në Parlamentin Evropian, David McAllister, Kurti ka thënë se marrëveshja duhet të ofrojë efektivitet në zbatim.
“Kryeministri Kurti dhe eurodeputeti McAllister diskutuan edhe për procesin e dialogut të lehtësuar nga BE, për propozimin Europian për normalizim të marrëdhënieve ndërmjet Kosovës dhe Serbisë, të rëna dakord në Bruksel me 27 shkurt, dhe për takimin që pritet të mbahet këtë fundjavë në Ohër të Maqedonisë së Veriut.
Sa i përket planit të zbatimit të Marrëveshje Bazë sipas propozimin Evropian, kryeministri tha se ai duhet të përmbajë detaje konkrete dhe të jetë gjithëpërfshirës, të ofrojë efektivitet në zbatim dhe të jetë i sekuencuar në mënyrë të balancuar”, është thënë në njoftimin e Zyrës së Kryeministrit.
Gjatë takimit është diskutuar edhe për rrugën e Kosovës drejt anëtarësimit në BE dhe Këshill të Evropës.
“Aplikimi i Kosovës për anëtarësim në Bashkimin Evropian, përveçse orientim e synim i hershëm, erdhi edhe si rezultat i progresit në vend, që u njoh edhe nga Raporti i BE-së për vendin.
Në takim, u diskutua pikërisht edhe për aplikimin e Kosovës dhe për rrugën përpara, dhe për finalizimin e procesit të liberalizimit të vizave për qytetarët e Republikës”, është thënë në njoftim.
Nacionale
Discussion about this post