Kryeministri i Kosovës , Albin Kurti, ka deklaruar se nuk do t’ia lejonte hyrjen në Kosovë, presidentit serb, Aleksandar Vuçiç.
Kurti tha se një njeri si Vuçiçi që e vë në pikëpyetje masakrën e Reçakut dhe e konsideron fabrikim, është person i padëshiruar në Kosovë.
Sipas kryeministrit, nëse Vuçiçi do të kërkonte leje ta vizitojë Kosovën, ai nuk do e lejonte.
“Nuk kam marrë asnjë kërkesë për një vizitë të tillë dhe natyrisht duke pasur parasysh rrethanat që ndodhemi ai nuk do të ishte një person i dëshiruar në Kosovë. Nëse kemi parasysh që personi që thotë Masakra e Reçakut është fabrikim dhe asnjëherë nuk e ndryshoi këtë gjë, unë nuk mendoj që do të duhej të vinte në Republikën e Kosovës”.
“Natyrisht që nuk do t’ia japë lejen. Por më mirë është me bo kërkesën njëherë. Tash me këtë që e thash se nuk ia jap lejen, nuk do ta bëjë as kërkesën. Më mirë ta bënte kërkesën por çka të bëjmë tash, e thashë”, deklaroi Kurti në ‘Klan Kosova’.
Kur moderatori iu kthye se Vuçiç tashmë nuk do të lodhet për të bërë kërkesë, Kurti u përgjigj se nuk e ka hallin e Vuçiçit se a lodhet ai apo jo.
Vuçiç ka thënë se deri në qershor e ka në plan që ta vizitojë Republikën e Kosovës për të qëndruar “një apo dy ditë dhe t’i vizitojë serbët në veri e jug”.
Discussion about this post