Kryeministri i Kosovës Albin Kurti ditën e sotme priti në një takim në Prishtinë, kryetarin e Grupit Parlamentar të Partisë Socialiste, Taulant Ballën me një grup deputetësh të Kuvendit të Shqipërisë.
Kurti ka komentuar këtë takim, duke bërë me dije se fokusi i bisedës ishte ecura e zbatimit të marrëveshjeve, të cilat u nënshkruan në mbledhjen e shtatë mes qeverive të dy vendeve, më 28 nëntor në Elbasan. Kurti ka theksuar se Kuvendet e Shqipërisë dhe Kosovës do të ndikojnë në konkretizimin e këtyre marrëveshjeve, duke kërkuar llogari nga qeveritë.
“Edhe Kuvendet tona respektive do të mund të japin kontributin e tyre, duke kërkuar llogaridhënie nga qeveritë se çfarë kemi bërë për të zbatuar marrëveshjen, por njëkohësisht edhe për t’u harmonizuar e sinkronizuar sa më shumë në arenën ndërkombëtare përsa i përket politikës së jashtme. Në Kosovë partitë politike nuk kanë dallime, sa i përket çështjes së Kosovës, por natyrisht nuk kanë as dallime përsa i përket çështjes së Shqipërisë, ndaj kjo e përbashkët e jona duhet të bëhet më funksionale dhe më aktive”, deklaroi Kurti.
Në mbledhjen e shtatë të përbashkët të Qeverisë së Republikës së Kosovës dhe Qeverisë së Republikës së Shqipërisë, u nënshkruan 13 marrëveshje mes dy vendeve.
Discussion about this post