Kryeministri i Kosovës Albin Kurti ka ftuar njerëzit përmes një postimi në faqen e tij në Facebook që të votojnë Lëvizjen Vetëvendosje dhe kandidatët e saj. Ai falënderoi për mikpritjen gjithë komunat, ndërsa përmendi se angazhimin e nisur do ta çojnë deri në fund.
“Shëndeti publik, financiar e social që erdhi nga ndryshimet demokratike me zgjedhjet parlamentare të 14 shkurtit 2021 duhet plotësuar e shtuar me zgjedhjet komunale të 17 tetorit 2021”, shkroi ai.
Kurti renditi disa nga arritjet që sipas tij ka shënuar qeveria brenda 6 mujorit të parë si një mënyrë për të sjellë në vëmendjen e votuesve që “dora e mirë e shtetit nuk është ndjerë kurrë kaq shumë. “Për vetëm 6 muaj qeverisje po shënojmë rritjen më të lartë ekonomike që vendi ka pasur ndonjëherë. Rritja për 6 mujorin e parë të vitit është 10.4%, dhe kjo trajektore parashihet të mbahet deri në fund të vitit, për të përmbyllur vitin me rritje ekonomike dyshifrore. Kemi rritje të qarkullimit të bizneseve për 36% krahasuar me vitin e kaluar, dhe 21% krahasuar me vitin 2019. Rritja e eksportit është edhe më impresive: vetëm këtë vit eksportet janë rritur mbi 60%”, u shpreh kryeministri i Kosovës.
