Ushtruesja e detyrës së Shefes se Grupit Parlamentar të Lëvizjes Vetëvendosje (VV), Mimoza Kusari-Lila, është shprehur kundër mocionit të opozitës që në rend të ditës të futet raportimi i kryeministrit Albin Kurti për marrëveshjen e Brukselit, të cilën e ka pranuar zyrtarisht të hënën.
Deputetja e VV-së ka kritikuar fjalimin e kryetarit të LDK-së, Lumir Abdixhiku, për mocionin, duke thënë se ai ka mbajtur fjalim patetik.
“Mocionin e kombinuar me fjalim patetik të Z. Abdixhiku para deputetëve ja rekomandoj ta bëjë në selinë e LDK-së, për arsye se Z. Abdixhiku jo që filloi të diskutojë për rëndësinë e mocionit por filloi të bëjë analizë të marrëveshjes.
Gjë që nuk e kishim dëgjuar të bëjë analizë krahasuese të marrëveshjeve të nënshkruara nga subjekti i tij në 2015, pastaj në 2020 dhe për dëmet apo regresin në procesin e dialogut. Rrjedhimisht para se të ngrejë alarmin për një marrëveshje të dakorduar në parim duhet të ja rikujtoj Abdixhikut se nga e njëjta foltore ka dalë dhe e ka akuzuar kryeministrin Kurti dhe qeverinë Kurti për izolim të Kosovës”, ka thënë ajo.
Ajo ia ka rikujtuar opozitës dhe të parit të LDK-së se ata e kanë ndalur debatin e kaluar parlamentar për çështjen e dialogut.
“Ne si Grup Parlamentar e konsiderojmë se një debat i tillë për dialogun është i paqëndrueshëm në kohen kur kryeministri nuk është këtu”, ka thënë Kusari-Lila.
Discussion about this post